KANHI chief trainer sa ALA Boxing Gym nga si Edito Villamor maoy usa mga dinapit sa ikatulong Philippine Professional Sports Summit nga gikatakda karong Septiyembre 29, 2021.
Gipaabot nga si Villamor, kinsa kaduha nahimong world title challenger sa iyang panahon, mopaambit sa iyang kasinatian isip professional boxer ug ingon man sa iyang kahibawo isip usa usab ka boxing trainer.
Ang ALA Boxing Gym naila sa ilang pag-ugmad og dekalibreng mga boksidor sa nasod.
Aduna usab kini promotional boxing outfit nga maoy nagpasiugda sa Pinoy Pride Boxing Series nga napasundayag dili lang sa bisan asa sa Pilipinas kon dili lakip na sa gawas sa nasod.
Apan human sa 35 ka mga tuig nga pagdumala, sa kalit lang, nanira ang ALA Boxing Club sa niaging tuig gumikan sa pandemya.
Pero wa kini makapaundang ni Villamor sa pagpadayon sa sports nga naghatag kaniya og giya sa iyang kinabuhi.
Sa pagsira sa ALA Boxing Gym, ang 50 anyos nga Villamor mipadayon sa mga adbokasiya niini pinaagi sa pagtukod sa iyang kaugalingong Villamor Brothers Boxing Gym nga anaa sa Pagsabungan, Mandaue City.
Iyang kaabag sa pagdumala ang iyang igsuon nga usa usab ka boxing trainer nga si Edmund.
“Yung isa sa ating mga kaibigan na si Edito Villamor, yun ang isa sa mga special na bisita natin na malaking tulong sa boxing ang ibang bagay pa,” matod ni Mitra sa interbyu sa Sports Ta Bai sports program sa Radyo One Cebu 90.1 FM.
Sa ikaduhang sunodsunod nga tuig, ang summit ipahigayon ubos sa virtual platform.
“Maganda ito, marami tayong matutunan,” dugang sa kanhi gobernador ug kongresista sa Palawan.
Gawas sa mga sports personalities, motambong usab ang pipila ka mga senador sama nila ni Senador Bong Go, Senador Joel Villanueva, Senador Sherwin Gatchalian, Congressman Nograles nga mopaabot usab sa ilang tagsatagsa ka mga mensahi lakip na ang commissioner sa Ched.
Giimbitar usab ang ubang mga opisyal sa professional leagues sa basketball, boxing, mixed martial arts, volleyball, football, golf, chess, billards ug esport sa maong forum.
Ang nahisgutang sports summit magdala sa tema nga Professional Sports Through pandemic: The Now and Future Directions.
Si Villamor, sa iyang bahin, mihulagway kang Mitra nga maoy pinakamaayong chairman nga nakadala sa GAB office sukad ma sukad.
Ang pagtabang sa mga boksidor, promoter ug manager ug sa kadali ug kasayon nga masampit maoy usa sa mga rason kon nganong daghan nagmadasigon karon sa boxing ug sa ubang mga sports.
“The Best Management ang GAB ngayon under ni GAB Chairman Baham Mitra,” asoy ni Villamor. (JBM)