GIOBSERBAHAN sa Department of Education (DepEd) ang kahimtang sa mga tinun-an sa Lalawigan sa Sugbo subay sa pag-abli sa school year (SY) 2021-2022 niadtong Lunes, Septiyembre 13, 2021.
Matod ni Dr. Marilyn Andales, DepEd Schools Division Superintendent sa Cebu Province, kasamtangang walay nasugatan nga kakulian ang mga tunghaan sa probinsya.
Pasabot ni Andales nga nangandam na ang mga magtutudlo sa posibleng kakulian nga moabot sa unang semana sa pagtungha ilabi na nga nagpadayon nga mogamit sa modular o distance learning ang mga tunghaan.
Subay sa uwahing tala sa kagamhanan, adunay moabot sa 508,647 ka mga tinun-an ang na-enroll sa probinsya ning school year.
Tungod kay linahi nga paagi ang pagtuon ning panahon sa pandemya, nagpasalamat si Andales sa mga ginikanan sa pag-abag niini sa pagtuon sa ilang mga anak.
Sa pagkakaron, nagpadayon ang paghimo sa mga magtutudlo sa modules nga gamiton sa mga tinun-an, lakip usab ang TV ug radio-based instruction.
Usa sa mga tunghaan sa lalawigan nga nilusad sa maong paagi sa klase mao ang Lawaan National Junior ug Senior High School sa Dakbayan sa Talisay diin ipaagi online ang modules diin tinguha niini nga mahimong sayon ang pagtuon sa mga tinun-an.
Karong tuiga, moabot sa 1,668 ang ning-enroll alang sa junior ug senior high sa maong tunghaan.
Diin gilauman nga magmalampuson kini sa pagtungha bisan sa linahi nga paagi sa pagtungha tungod sa Covid-19 pandemic.
Tinguha sa DepEd nga gawas sa mga ginikanan ug magtutudlo, mopadayon ang suporta sa mga lokal nga kagamhanan ug ubang stakeholders. (ANV)