HAPIT na makuha sa kapulisan sa Probinsya sa Sugbo ang herd immunity sa dihang niabot na ngadto sa 90 porsiyento sa ilang kinatibuk-ang pwersa ang nabakunahan na.
Moabot na ngadto sa 2,008 ka miyembro sa Cebu Police Provincial Office kon 90 porsiyento sa 2,232 nila nga police personnel ang nabakunahan na.
Matod ni Police Colonel Engelbert Soriano, hepe sa kapulisan sa Lalawigan sa Sugbo, nga 30 porsiyento niini ang nakadawat pa lang sa unang dose sa bakuna, samtang ang 60 porsiyento ang kompleto na.
Pasabot ni Soriano nga adunay gibana-bana nga 224 ka mga personnel ang wala pa mabakunahi sanglit kasagaran kanila adunay gihambin nga sakit sama sa hubak, taas og blood pressure, gi-ubo ug sip-on ug pipila kanila nagdumili lang nga mabakunahan.
“Kaya lang medyo mahirap mag-100 percent kasi yung iba may conditions na hindi talaga pumapayag yung doctor na bakunahan,” pasabot ni Soriano.
Iyang giklaro nga dili pinugsanay ang pagpabakuna sa mga police.
Apan iyang gipahibawo nga kadtong mga police official o personnel nga nagdumili nga mabakunahan bisan pa man nga maayo ang panglawas, ang gipapirma og waiver nga nagpamatuod nga ang maong pulis ang mihukom nga dili magpabakuna.
Ang waiver ipadala kini sa kampo Crame aron masayod ang PNP Chief kon paninglan siya niini. (AYB)