NAGKADAIYANG pakulo ang gihimo sa local government unit (LGUs) sa Probinsiya sa Sugbo aron pag-enganyo sa mga residente nga magpabakuna kontra Covid-19.
Ang Lungsod sa Consolacion ang mihatag og kahigayonan niadtong mga konstituwente nga dili makalugar og pabakuna sa adlawan tungod kay adunay trabaho hinungdan nga gilusad ang “Bakuna Nights.”
Ang “Bakuna Nights” kon ang paghatag og bakuna sa gabii gisugdan niadtong Septiyembre 14 sa 6:00 sa gabii sa Consolacion Covered Court.
Pahibawo ni Mayor Johannes Alegado nga ang “Bakuna Nights” ipahigayon matag gabii sa Martes ug Huwebes.
Gawas niini, mipasiugda sab si Alegado og online raffle promo nga gitawag og “Bida Bakunado” diin mopili og 80 ka mga residente ang makadawat og 25 kilos nga bugas ug laing 10 ang nakadaog og P500 nga gift check.
Misaad si Alegado nga dugang dagkong papremyo ang madawat sa masuwerting vaccinees sama sa appliances, refrigerators ug uban pa.
Borbon
Samtang sa Lungsod sa Bordon masaligon nga 100 porsento sa ilang mga senior citizens ang magpabakuna ilabi na nga adunay food incentives nga ilang ihatag.
Ang Borbon nagtanyag og tag-10 kilos nga bugas ug de lata ingon man libreng sakay pinaagi sa paghatod ug kuha sa kadtong magpabakuna.
Si Borbon Mayor Noel Dotillos miingon nga nagsugod ang pagpanghatag sa maong food incentive niadtong buwan sa Hunyo.
Dugang pa ni Dotillos nga moabot na ngadto sa P100,000 ang ilang nagasto alang sa maong food incentive program.
Carcar
Sa Carcar City nagpa-raffle og mga papremyo alang niadtong mga walk-in eligible resident niadtong Septiyembre 9.
Usa ka 50 kilos nga bugas nagsilbing grand prize, duha ka winners sa 25 kilos nga bugas ug 50 ka mga midaog sa food packs.
Pinamungajan
Si Pinamungajan Mayor Glenn Baricuatro nipahibawo nga nagsugod sa miaging semana ang pagpamakuna sa mga senior citizens ug kadtong adunay balati-an.
Matod pa ni Baricuatro nga aduna pay mga residente ang nagduha-duha nga magpabakuna.
“Pareha gihapon sa tibuok Sugbo nga dunay mga tawo nga motuo’g duwende pero di motuo og bakuna,” matod ni Baricuatro.
Ang maong mga lungsod ug dakbayan mag-agad sa vaccine supplies nga itagana sa Department of Health (DOH).
Lapu-Lapu City
Sa Lapu-Lapu City gitun-an pa ang paghatag og diskuwento alang niadtong mga nabakunahan nga mamalit ngadto sa grocery ug supermarkets.