DUHA ka mga inahan nga positibo sa Covid-19 gipaanak sulod sa ambulansya sa Lapu-Lapu City Rescue sa tungang gabii sa Miyerkules, Septiyembre 15,2021.
Si Nagiel Bañacia, pangu sa Lapu-Lapu City Disaster Risk Reduction and Management Office, nibutyag nga wa silay laing nahimo gawas sa pagpaanak sa duha ka mga inahan kay puno ang mga ospital.
Matod ni Bañacia nga di unta kini angay buhaton kay risgo sa inahan ug bata, apan tungod sa sitwasyon, napugos ang mga personnel sa pagbuhat niini.
Hinuon, luwas nga napaanak ang duha ka mga inahan.
Bisan pa niini, nangayog despensa si Bañacia sa mga banay sa duha ka mga inahan sa hitabo.
Ang mga inahan ug ilang mga masuso naa na karon giatiman sa Lapu-Lapu City Hospital.
"Sa mga inahan ug kabanay, pasayloa mi sa panghitabo. Wala mi mahimo kon dili ang pag-paanak na lang diha sa dili saktong lugar aron maluwas ang bata ug inahan," matod ni Bañacia sa iyang Facebook post. (REV)