LAHI nga kontra, lahi nga esena, lahi sab nga engkuwentro. Mao kini ang sagubangon ni figthing senator Manny Pacquiao sa umaabot nga mga adlaw.
Ang Pambansang Kamao ng Pilipinas mipasaka og kasong cyberlibel batok sa sama niyang pastor nga si Apollo Quiboloy niadtong Martes, Septiyembre 14, 2021 sa Makati City Prosecutor’s Office.
Kini kalabot sa pasangsil ni Quiboloy nga dili saktong paggamit ni Pacquiao sa P3.5 billion nga pundo sa gobiyerno dihang kongresista pa kini sa Sarangani Province.
Matod ni Pacquiao nga usa kini ka mugna-mugna nga pasangil ug nangayo siya og P100 million nga danyos batok kang Quiboloy.
Si Quiboloy, kinsa mitawag sa iyang kaugalingon nga “Appointed Son of God” mipadayag sa iyang akusasyon batok sa Pambansang Kamao ng Pilipinas pinaagi sa iyang SMNI network sa telebisyon ug social media.
Nipakita si Quiboloy og video clips sa wala nahuman nga Sarangani Sports Training Center nga maoy matod niya maoy gigastuhan sa nahisgutang pundo sa gobiyerno.
Basi sa taho sa Spin.ph, gitataw ni Pacquiao nga karaan ang video clips nga gipakita ni Quiboloy sa video ug dili kini mao ang iyang gipundohan nga sports center nga nagbalor og P300 ngadto sa P500 million.
Gibutyag sab ni Pacquiao nga ang P3.5 billion nga pundo nga gitumbok ni Quiboloy gitagana alang sa Philippine Sports Training Center sa Bataan diin giklaro sa 8-division world champion nga wala siya’y kalambigitan ning maong proyekto.
“He used deliberate falsehood to brainwash the minds of the Filipino public, recklessly propagating it to blacken the image and reputation of an honest public servant,” tipik sa pamahayag ni Pacquiao sa iyang opisyal nga reklamo nga napatik sa Spin.ph.
Matod ni Pacquiao nga ang iyang gipangayong P100 million nga danyos ning maong kaso iyang ihatag nga donasyon alang sa mga uyamot.
Ning pagsuwat, wala pa nagpagawas og reaksyon si Quiboloy kabahin ning maong isyu. (ESL)