Paglikay aron dili mamatay

MAAYONG adlaw, mga Super Suki. Kumusta ang atong kinabuhi?

Magduha na ka tuig sukad natugaw ang atong kinabuhi tungod sa pandemiya sa Covid-19.

Nia na ta sa Delta variant tungod sa pag-usab-usab ug pag-level up sa virus. Daghang mga sports facilities ang mihangyo nga uban sa pagkonsidera sa dagan sa ekonomiya, nga tugotan sila sa pag-abli aron bisan ginagmay lang, dunay income nga masulod sa ilang naparalisa nga negusyo.

Sa pagpaluyo ug pagsabot sa buhatan sa Sports Development Division sa City Mayor's Office nga gidumala ni Division Head, Michael Denton Aportadera, ubay-ubay nga mga pasilidad ang gitugotan gawas lang sa mga contact sports, uban sa kasabutan nga ipatuman sa mga tag-iya ang tanan nga heath protocols nga gilatid sa Covid-19 Inter-Agency Task Force alang sa seguridad sa tanan.

Daghang higayon nga nakauban ko sa pag-inspeksiyon sa mga sports facilities sa dakbayan sa Davao ug usa ko sa nakasaksi giunsa sa mga tag-iya pagtagad ang kaayo sa gobyerno nga naghatag og pagtagad sa kahimtang sa katawhan.

Gihatag sa SDD ang listahan sa mga batakan nga panginahanglan nga tumanon aron makahimo sila sa pag-abli sa ilang negusyo bisan sa ginagmay ug limitado nga capacity lang.

Daghang mga higayon nga nagpailob ang mga inspectors ug ang uban sirad-an pa ang ilang mga buhatan aron dili makasulod ang moinspeksiyon sa ilang kahimtang.

Ang uban, modali-dali pagsuot sa ilang mga face mask ug pagplastar sa mga gamit kon nagapadulong na ang mga inspector.

Sa gihapon, daghan ang mga paglapas kay gibalewala ug mora'g nakaminus sa mga nagainspeksiyon labi na kon dunay mga ginasaligan nga mga padrino o mga inila nga pangalan.

Ang pagdala sa sakop sa Davao City Police Office naghatag og ngipon sa mga balaod aron ipatuman sa mga fitness gyms hinungdan nga daghan ang giisyuhan og citation tickets aron ilang tubagon ang ilang paglapas sa health protocol.

Mga himsog man unta og panglawas nga mga tawhana, apan gahi makasabot sa balaod nga ginapatuman.

Ang mga tag-iya sa fitness gyms nahimo sab nga ulipon sa ilang mga parokyano kay dili man sila tuohan hangtud nga ang tag-iya ug mga kustomer nga naglapas ang namultahan.

Luoy ang mga tag-iya sa mga gym kay ang ilang negusyo mosangko gyud sa pagsirado kon ang mga gym imbis fitness ang katuyoan, mahimo na nga breedinganan sa virus diin mapasapasa kay walay distancing ug balaod nga ginapatuman.

Daghan ang daw gisumhan na sa isyu sa Covid-19, apan basin diha pa mo makaamgo panahon nga ikaw o usa sa pamilya naa nay matakbuyan.

Karon, nabahin ang hunahuna sa mga Dabawenyo tungod sa pahayag ni Mayor Sara Duterte-Carpio nga hugot nga ipatuman ang vaccination sa buhatan sa gobyerno labi na sa mga empleyado ug mga job orders sa dakbayan sa Davao nga dili na i-renew sa trabaho ang dili magpabakuna.

Dili pa nato matino unsay sulod ug kamatuoran sa gipamulong sa Mayor samtang nagapaabot ang katawhan unsa gyud ang mahimo nga lintunganay sa umaabot nga mga adlaw.

Sa mga mando sa gobyerno aron malikayan ang pagtinakdanay, mas maayo nga magmatngon kaysa mahimong usa sa mga biktima sa kamatay nga atong nahibaw-an nga nagakahitabo dinhi sa atong dakbayan ug sa silingan nga mga lungsod ug mga probinsiya kay ang Covid-19 dili na nato masabtan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph