GIPAKUSGAN pa sa Davao City Police Office (DCPO) ang ilang pagbantay sa seguridad sa siyudad kon diin ang threat level naa sa "Alert Level 3," isip tubag sa posibleng terror attacks sa unom ka mga nasud sa Southeast Asia, naglakip sa Pilipinas, nga gibutyag sa kagamhanang Hapon.
Ang Foreign Ministry sa Japan nag-awhag sa ilang mga molupyo niadtong Lunes, Septyembre 13, nga magpalayo sa mga relihiyusong pasilidad ug daghang mga tawo tungod sa posibleng pag-atake.
Ang ministry nagsulti nga nakuha nila ang impormasyon nga "there are increased risks such as suicide bombings."
Si DCPO Director Kirby John Kraft nagsulti sa virtual presser Miyerkules, Septyembre 15, nga nasayud sila sa taho gikan sa Japanese Embassy.
Apan si Kraft nagtin-aw nga ilang gisusi ang impormasyon. Hinuon, ang opisyal dugang nagkanayon nga gipalig-on pa ang ilang border control checkpoint, ilabi na sa pagsulod sa dakbayan.
Ubos sa Terror Threat Advisory System sa Anti-Terrorism Council, ang lugar ibutang ubos sa Threat Level 3 "when a terrorist attack is a strong possibility within a short period of time."
Tataw sa opisyal nga ang siyudad duol sa utlanan sa Central Mindanao, kon diin dunay mga gitahong presensiya sa armadong grupo nga nalambigit sa Islamic State of Iraq and Syria (Isis).
Sa pagkakaron, wala pay "augmentation" sa dugang personnel visibility. Apan kinahanglan nga makigtagbo sila sa ubanpang mga nagkadaiyang security forces aron nga hisgutan ang bag-ong taho gikan sa kagamhanang Hapon.
"Dito pa po natin malalaman 'yung mga dapat nating additional na gagawin upang protektahan ang Davao City," matud ni Kraft.
Puno pa sa opisyal nga gitun-anpa nila ang taho, ilabi na nga duna kini "broad scope."
Gipasalig niya nga ang DCPO, sa pakig-alayon sa Task Force Davao, nagpahugot sa ilang mga border checkpoint.
Gipaklaro ni Kraft nga ang siyudad "generally peaceful" pa, diin way mga dagkong insidente nga gitaho.
Ang lokal nga panggamhanan pormal nga naglusad sa "May Nakita? Dapat Magsalita!" usa ka "culture of security" campaign nga nagdasig sa mga Dabawenyos nga mosagop sa pagkamabinantayon isip kbahin sa ilang paagi sa kinabuhi niadtong Hulyo 2020.
Ang kampanya gipabuhagay sa online niadtong Miyerkules sa lokal nga panggamhanan ug sa Task Force Davao, human nagpagawas og Executive Order 41 si Davao City Mayor Sara Duterte-Carpio, ang mando nga nagdasig sa mga Dabawenyos "to Adopt the Culture of Security as Part of their Way of Life." (RGL/Uban sa taho sa AP ug Sunstar Philippines)