BISAN tuod kon ang Siyudad sa Davao kasamtangang nag-atubang og kakuwang sa suplay sa oxygen tank, gibutyag ni Mayor Sara Duterte-Carpio nga ang konstraksiyon sa oxygen plant sa siyudad di pa mahitabo tungod sa "procedural requirements of government procurement."
Gikanayon ni Duterte-Carpio niadtong Lunes, Septyembre 13, 2021, nga ang establisemento sa oxygen plant maoy tubag sa nagkataas nga mga kaso sa Covid-19 sa siyudad tungod sa gitahong emerhensiya sa mas highly infectious nga Delta variant.
Gisulti sa mayor nga ang pagtigom og igong medical oxygen supply sa siyudad maoy usa sa mga tubag sa lokal nga panggamhanan sa pagtaas sa ihap sa mga kaso nga miresulta sa mas taas nga demanda sa oxygen tanks.
Ang tagi-tagi alang sa P23-million oxygen supply fund gilangkuban sa P12 million alang sa pagpalit og 1,000 oxygen tanks nga dunay regulators alang sa mobile surgical unit ug P11 million alang sa katukuran sa oxygen plant nga kompleto sa mga accessories ug warehouse.
Tug-an sa mayor nga ang plano nga oxygen plant matukod duol sa City Government-run slaughterhouse sa Barangay Ma-a.
Bisan sa bag-ong naaprobahan nga ordinansa, gisulti sa mayor nga ang katukuran sa oxygen plant di pa mahitabo karon.