600 giayo sa tuob

ANAA sa 600 ka mga molupyo sa Barangay Bituan, Tulunan, North Cotabato nga dunay nasinating sintomas sa coronavirus disease 2019 (Covid-19) ang nangaayo tungod lang sa tuob.

Matud ni Max Casulakan nga siya ug iyang mga silingan gipang-ubo, sip-on, kalintura ug nawad-an na sa panimhot ug wala nay lasa ang ilang gikaon.

Tungod sa kalayo sa ilang dapit, walay kuwarta pang-ospital ug nahadlok sab sila molugsong sa kahadlok sa Covid.

Tungod niini, migamit na lang og tuob ang mga molupyo sa maong barangay ug wa dangti og dugay, nangaayo ang ilang sakit.

Apan mga doktor sa probinsiya wala nagrekomenda sa tuob gumikan wala kini siyentipikong basehan nga epektibo nga pangontra sa Covid-19.

Matag barangay sa maong lungsod dunay gidestino nga mga health workers nga maoy duolan sa mga molupyo nga makasinati sa sintomas sa kagaw.

Giklaro sab ni Dr. Jun Sotea sa Integrated Provincial Health Office-Cotabato nga bisan daghan ang naayo sa traditional practices, mas tukma gihapon ang magpa-check-up sa mga balay tambalanan aron matagaan og tambal ang mga pasyente ug dili mograbe ang ilang sakit.