MAGLIBOG ko usahay kon malipay ba o maguol. Ngano man?
Maguol ko kon motan-aw ko sa padayon nga pagsaka sa Covid cases, labi na kay mi-enter the dragon pod ning gitawag og Delta variant nga makahadlok pod. Makaguol huna-hunaon nga sigi lang nagsaka ang gidaghanon, mora’g wa pa moabot ang panahon nga mokunhod na.
Tungod niini, nagkadaiya lang pod ang reaction sa mga LGUs. Dunay istrikto kaayo sa kwarintinas, duna poy uban nga medyo luag-luag ra. Pero ang epekto, daghan ang nawad-an sa trabaho, daghan sab ang di makauli tungod sa kalisod.
Unya karon kay nagkaduol na man sab ang piniliay, kalandrakas pod og apil ang mga pulitiko. Wa’g tuo ang batikos, maglibog na lang ang katawhan kon kinsa kanila ang tinuod ug kinsa kanila ang angay tuhoan.
Makalingaw sab ni kay bibo man ang batikos, at least, ma-distract imong attention gikan sa kakulba sa Covid.
Buot ipasabot, miabot na pod ang kasadya sa pulitika, diin isig pakita’g milagro ang mga pulitiko.
Kining bawsanay nga atake sa pulitika usahay makalipay kay daghan man ta’g mahibaw-an; mogawas man ang mga sekreto kay isig daotay na man.
Kadtong mahilig og drama, mao gyod ni ilang gipaabot kay perteng biboha man ang bawsanay sa isyo.
Pananglit, kining bayloay og hait nga mga batikos tali kanila ni Presidente Rodrigo Duterte ug ni Senador Dick Gordon makalingaw paminawon kay moabot na man sa mga butang nga personal na kaayo sama sa iyang dakong tiyan ug hinapay.
Unya kay mideklarar na man pod si Senador Ping Lacson ug Senador Tito Sotto nga modagan pagka presidente ug bise-presidente, dali ra pod kaayo sila miapil sa ratsada batok ni PRRD.
Makalingaw unta ni kay isig bayloay man og mga isyo, pero kon moabot na ning drama sa ilang trabaho nga gamiton na pod og pamulitika, dili na pod na maayo. Gani, makadaot na pod na kay apektado man ang tibuok katawhan sa ilang gihimo o himuon.
Dunay usa ka gobernador nga matod pa sa taga city health authorities nag-positive sa Covid human mo-atender sa usa ka kalihokang politikal.
Ang angay unta buhaton, prisohon siya ug ipailawm sa naandang mahitabo sumala sa IATF rules.
Apan naunsang pagka-unsaa nga wala man ipatuman ang reglamento. Sigi lang gihapon og suroy-suroy, atender sa mga meeting ug padayon sa iyang kampanya sa lain-laing mga lugar.
Imbis siya ang mag-ulo sa pagsunod sa lagda, siya na hinuon ang nag-una og supak niini.
Istrikto siya mopatuman sa kwarintinas pero labaw pod siya ka salawayon kay di man niya sundon ang iyang lagda.
Delikado ang iyang gihimo, dili lang sa iyang panglawas kondili ang panglawas sa katawhan nga ma-duol kaniya. Matawag na nga Covid-spreader ni siya.