Dear Noy Kulas,
Maayong adlaw. Tawga lang ko og Boyet, taga sout sa Cebu ko ug matawag nga working student kay nag work man ko ug gaeskwela. Midiskarte na lang ko og akoa aron makahuman ko sa akong study kay human mamatay si Mama, si Papa wa na mgtagad namo. Iya na lang ming magsuon og diskarte aron mabuhi.
Naa ko ga work sa couple nga ang bana guwang na, mga 70 years old ug ang asawa mga 50 years old tingali. Hinay na kaayo ang bana but sexy pa si Maam. Wa sila makaanak bisan 20 years na silang minyo. Maayo ra sila nako ug si Sir buotan kaayo. Siya pa ang sige og encourage nako nga makahuman ko ug sige og check kon maayo ra ba ang signal sa ilang wifi.
Karon rang bag-o, si Maam mosekreto og pa massage nako basta molakaw si Sir kon molakaw magpa check up. Noy, nakabantay ko ni Maam nga laing og tuyo kay duol na lang sa tunga sa iyang paa ang iyang ipa massage nako pero wa ko mokagat. Unsa kahay akong buhaton kay sa akong tan-aw, lain ang iyang tuyo unya as if saputon siya human. Please, Noy, need ko nimo og advice.Daghang salamat.
BOYET
Boyet,
Kon tinuod nang imong gisulti, kana tuod pasumbingay na nga tentasyon. Usa lang nimo ka sayop, maguba na ang imong kaugmaon kay masundan pa na og kadaghan. Sugod ra na ug magsige na.
Kon ang imong Maam modiga na gyud, pasabta siya nga di ka makahimo tungod sa imong respeto niya ug sa iyang bana nga imong giisip nga imong mga ginikanan. Bitaw, bisan wa ka pa mosulti sa imong edad, klaro man nga ang imong edad maorag lang og ilang anak.
Makasabot ra na si Maam nimo labinag imong daygon yet galikay ka kay imo silang girespeto.
NOY KULAS
kulassuper@sunstar.com.ph