TAN-AWA ra ning Inter-agency Task Force (IATF), nag-usab-usab na pod sa ilang desisyon. Human sa pagpaubos sa enhanced community quarantine (ECQ) sa National Capital Region (NCR) niadtong Agosto, ila kining gipaubos ngadto na sa general community quarantine (GCQ) sa Septiyembre 8. Apan wala dangti og usa ka adlaw, gibakwi sa IATF ang quarantine classification. Gibutang sila sa modified enhanced community quarantine (MECQ), ikaduhang labing estrikto sa quarantine status.
Unsay rason? Gumikan kay taas kuno gihapon ang mga kaso sa Covid 19 sa NCR. Ikaduha, maoy desisyon sa mga doktor ug mga experts nga anaa sa IATF. Tan-awa ra kon unsa kini sila ka boang. Maayo lang sila og maoy mabulilyaso kay ila dayon bakwion. Apan kon local officials, dili gani mosunod sa ilang kamanduan, ilang kontrahan. Sama sa nahitabo tali sa Lalawigan sa Sugbo, gumikan sa lahi nga baruganan ni Gov. Gwen Garcia kabahin sa overseas Filipino workers (OFW) ug returning overseas Filipinos (ROF) nga swab upon arrival policy.
Gumikan sa pag-usab, mitiyabaw ang mga negusyante kay ubos sa MECQ, adunay mga establisemento nga dili tugutan nga maka-operate. So, mawad-an na usab og panginabuhian ang uban. Puwerting sukoa ni Presidential Spokesperson Harry Roque kay ang una nilang rekomendasyon giaprobahan naman unta ni Presidente Duterte.
Mao lagi na ang kanunay nakong gi-ingon nga kining IATF, laban-bawi nga polisiya.
GISAWAY
Gisaway ni DILG Undersecretary Epimaco Densing ang kamanduan ni Vice Mayor Mike Rama sa ang acting mayor pa siya, nga kadto lang bakunado ang tugutan nga makasulod ug makakaon sa restaurants. Gani, gusto kining ipaimbestigar ni Interior Sec. Eduardo Año kay way pagtugot sa IATF.
Matod pa ni Año nga dili pa makatatunganon nga himuon kining polisiya sa pagkakaron gumikan kay daghan pa ang wala mabakunahi. Makamugna kuno og kagubot tali sa mga bakunado ug dili bakunado. Apan si Mike desidido kay matod pa niya ang iyang gihimo alang ra usab sa katawhan nga malayo sa pagtakod sa virus. Aw, atong tan-awon og dili ba ni mokakak si Mike kon ipiton na sa DILG. (bobbygnalzaro@gmail.com)