USA sa mga public official nga transparent kaayo sa iyang swab test results mao si Gobernador Gwendolyn Garcia. Basta di na gani makita kaayo sa publiko ang gobernador kay hayan nipahuway taliwa sa grabe niyang mga schedule sa mga lakaw, di na siya makita.
Kay panahon karon sa pandemic sulod na sa dul-an sa duha ka mga tuig, mokatap dayon ang mga hungihong nga positibo sa Sars-CoV-2, kagaw sa coronavirus disease 2019 (Covid-19), ang gobernador. Apan dali ra dayon kining mapawong kay naa man dayoy ipresentar nga swab test result ang gobernador. Bisan gani sa iyang mga biyahe gawas sa Sugbo, naa siyay ipakita sa publiko nga resulta. Ingon niana ka transparent ang gobernador.
Nasayod si Garcia nga usa siya ka public official. Kinahanglan masayod ang publiko unsa ang tinud-anay nga estado sa iyang panglawas.
Samtang si Bohol Gov. Arthur Yap nahungihong nga positibo sa Covid-19. Iyang gipanghimakak nga positibo siya sa virus. Matod sa iyang executive assistant, Reyna Clemeña Deloso, negatibo ang swab test results sa gobernador, kinsa niabot sa Bohol niadtong Dominggo, Septiyembre 12, 2021 gikan nitambong sa national convention sa PDP-Laban.
Pagtumaw sa mga hungihong, bisan ang iyang mga kauban sa PDP Laban sa Sugbo nabalaka nga maoy nakapaaghat sa kampo sa gobernador sa pagluwat og pamahayag.
Dali ra ning pagngon ang mga hungihong. Angay nilang kat-unan ang gibuhat ni Garcia sa pagpatay sa mga hungihong. Ipagawas ang resulta sa swab test kay mao ra ni ang bugtong paagi sa pagpawong sa di maayo nga hungihong. Mao ra usab ni ang makahupay sa mga kabalaka sa mga opisyal nga iyang na close contact.
Wa na kinahanglana pa ang pagluwat og mga pamahayag tungod kay ang kopya sa swab result mosulti na sa iyang kaugalingon.