GIPAHUGTAN sa kapulisan sa Siyudad sa Sugbo ang pagbantay sa mga pantalan, simbahan, shopping malls ug uban pang pampublikong lugar human mipagawas og advisory ang Japan sa ilang citizen nga magbantay sa teroristang pagpangatake sa Southeast Asia.
Miangkon ang Cebu City Police Office (CCPO) nga wala pa silay kongkretong impormasyon gikan sa intelligence community ug sa PNP National Headquarters labot sa hulga sa teroristang pagpangatake.
Apan bisan pa niini, matod ni Police Lieutenant Colonel Wilbert Parilla, deputy city director for operations sa CCPO, nga wala nila kini gibaliwala hinungdan nga ilang gipahugtan ang pagbantay sa vital installations.
Gipalambo usab nila ang ilang intelligence monitoring inabagan sa publiko nga maoy ilang basehan sa impormasyon.
“Intelligence monitoring and target hardening ang atong gihimo karon. That is always our actions taken, target hardening for all the possible area nga pwedeng dunay mahitabo,” matod ni Parilla.
Ang mga dapit nga hugot nga gipangbantayan sa kapulisan sa siyudad sa Sugbo mao ang mga publikong lugar nga kasagaran tapokanan sa daghang mga tawo.
Matod ni Parilla, nagpadayon ang ilang pakig-alayon sa Muslim community nga maoy kaabag sa ilang pagpatunhay sa kahusay ug kalinaw sa siyudad sukad pa kaniadto.
Naa pa sa normal status ang kapulisan sa Siyudad sanglit wala pay kamandoan gikan sa Camp Crame.
Ang Visayas Command (Viscom) pinaagi ni Major General Pio Diñoso III mipagawas og pamahayag nga wala pa silay nadawat nga official report labot sa gipagawas nga advisory sa embahada sa Japan dinhi sa nasud.
Apan ang maong impormasyon ilang giila nga seryuso ug importante nga tungod niini mohimo silag validation unsa ka tinuod ang mga kasayuran nga nakuha.
“As far as Visayas Command is concerned, we have not received any official report regarding this matter. Yet, we will treat this information important and will validate this travel advisory issued by the Japanese government to its citizens in Southeast Asia,” matod ni Diñoso.