GIHUWAT na lang sa Metro Cebu Water District (MCWD) ug sa ilang contractor ang pagtugot sa Office of the Government Corporate Council (OGCC) aron masugdan na og trabaho ang tulo ka desalination plants nga mohatag og 80 million liters per day.
Si Jose Daluz III, chairman sa board of directors sa MCWD, nagkanayon nga apil sa guidelines sa National Economic Development Authority (Neda) ang pagtugot sa OGCC sa dili pa mohatag og notice to proceed ngadto sa FDC Utilities Inc-Hitachi Aqua-Tech Engineering Pte. Ltd nga niduso sa ilang unsolicited proposal.
Way laing kompaniya ang nipadangat sa ilang Swiss-challenge.
“Sa pagkakaron, naa ang papel, katapusan na lang gyud ni nga stage naa na sa OGCC kay requirement man kini under Neda guidelines nga before i-finally award the three contracts sa FDC-Hitachi, kinahanglan nga adunay final review sa OGCC then mag final na mi og pirma sa kontrata,” matod ni Daluz.
Matod niya, nga kon makakuha sila og approval gikan sa OGCC sa Oktubre, posible sa Nobiyembre makasugod na ang contractor sa pagtrabaho sa desalination plant sa South Road Properties (30 million liters per day), Talisay City (20 million liters per day) ug Marigondon (30 million liters per day).
Gawas sa tulo ka planta, adunay surface water nga gi-develop ang MCWD nga nakig-joint venture sa JE Hydro and Bio Energy Corp. sa sapa sa Lusaran aron makahatag og 20 million liters per day sa siyam ka mga barangay sa Dakbayan sa Sugbo nga maagian niini paingon sa barangay Lahug nga gikatakdang moagas sa Mayo 2022.
“If naanay OGCC like October, sugod dayon na inig November kay notice to proceed naman lay kuwang ana. So, ang construction is one year and six months. So, by second quarter sa 2023, naa na tay 120 million liters per day (MLD) apil na ang Lusaran water ug sa Cordova (20 MLD) kansang papel tua na usab sa OGCC for review,” dugang ni Daluz. (PAC)