NANAWAGAN ang Cebu Provincial Health Office (PHO) sa mga Sugboanon nga bisan sa nagpadayon nga hulga sa coronavirus disease 2019 (Covid-19), gikinahanglan gihapon ang pagmatngon sa presensya sa dengue ilabi na sa nasinating pag-uwan uwan sa Sugbo, matod ni Dr. Christina Giango, pangu sa PHO.
Subay sa talaan sa mga nataptan sa dengue sukad sa Enero 1 hangtod sa Agusto 7 ning tuiga, adunay nalista nga 470 ka mga kaso sa dengue, upat niini nangamatay.
Matod ni Giango nga subay sa monitoring sa opisina, natala ang taas nga mga kaso sa dengue sa lungsod sa Minglanilla nga dunay 72 ka mga kaso.
Gisundan kini sa dakbayan sa Talisay nga may 70 ka mga dengue cases.
Tungod niini, giawhag ni Giango ang mga residente sa lalawigan sa kanunay nga paghinlo sa palibot, pagsiuguro nga way mga stagnant nga tubig ug uban pang paagi nga malikayan ang pagpundo sa mga lamok. (ANV)