Seguridad sa Bar exams, COC filing gipangandaman

GIPANGANDAM sa Cebu City Police Office (CPPO) ang paghatag og seguridad sa nagsingabot nga Bar examinations 2021 nga himuon sa Siyudad sa Sugbo sa unang higayon ubos sa digital nga pasulit karong Nobiyembre 2021.

Kagahapon, Septiyembre 15, nagtigom ang mga opisyal sa CCPO ug mga representante sa Korte Suprema aron mahan-ay ang seguridad sanglit adunay tulo ka unibersidad sa siyudad nga venues sa Bar exams, ang University of San Carlos (USC), University of Cebu (UC) Banilad campus ug ang University of San Jose Recoletos (USJR).

Matod ni Police Lieutenant Colonel Wilbert Parilla, deputy city director for operation sa CCPO, dili lang ang kapulisan ang nangandam sa labing unang Bar exam nga gihimo sa dakbayan, apil na niini ang kagamhanan sa siyudad.

Gipanglantawan nga ang taga lalawigan sa Bohol ug mga silingang rehiyon sa Visayas nga dinhi sa siyudad sa Sugbo mokuha og Bar exams.

Dugang ni Parilla nga wala pa sila makahukom kung pila ka pulis ang ilang ipakatap sa tulo ka unibersidad sanglit magtagbo pa silag balik uban ang mga opisyal sa Korte Suprema.

“As of now we are on the process of the preparations it includes with other agencies kay daghan man ni ang atong area dinhi sa testing sites and ang atoang nagdumala ani. They want this successful,” dason ni Parilla nga dako og tabang kini sa mga mokuha sa pasulit gikan sa Kabisay-an ug Mindanao.

Lakip usab sa gipangdaman karon ang pag-file sa certificate of candidacy (COC) sa mga kandidato sa Siyudad sa Sugbo sa sunod buwan.

Gibutyag ni Parilla nga aduna nay mga pulis nga gipakatap sa buhatan sa Commission on Election (Comelec) sa dakbayan sukad sa pagsugod sa voter’s registration.

Gipahibawo ni Parilla nga hugot nga gidili ang pagdalag supporters sa Comelec sanglit kalapasan kini sa lagda nga mao ang mass gathering tungod kay naa pa sa general community quarantine ang tibuok siyudad.

Magtagbo usab ang Comelec, kapulisan ug ang kasundalohan alang sa Regional Joint Security Control Conference alang na sa pagpangandam sa eleksyon sa sunod tuig. (AYB)