DILI na kinahanglan nga mopaubos sa RT-PCR test o antigen test atol sa filing sa certificate of candidacy (COC) karong Oktubre 2021 alang sa mga mokandidato sa eleksiyon sa Mayo 2022.
Giklaro kini ni Lionel Castillano, election officer sa Probinsya sa Sugbo, tungod sa mga hugonhugon nga nagkinahanglan og negative swab test sa pag-file sa COC.
Apan, matod ni Castillano, ang buhatan sa Commission on Election (Comelec) mopatuman sa hugot nga health protocol sama sa limitado lang sa duha ka mga kandidato ang makasulod sa samang higayon.
Matod ni Castillano nga tungod sa nagpadayon nga pandemya sa nasud, gikinahanglan nga magmatngon usab ang mga buhatan nga dili makalapas sa health protocols batok sa Covid-19.
“Ato lang klaruhon, wala mi mag require og antigen or RT-PCR test. Katong naa sa Comelec resolution requiring antigen or RT-PCR test only applies sa Comelec Manila katong mo file didto,” matod ni Castillano.
Sukwahi sa mga eksena sa milabayng COC filing, gilauman sa Comelec nga dili mapuno og dumadapig sa mga kandidato ang ilang buhatan tungod sa ilang ipatuman nga estrikto nga lagda sa health protocol.
“Actually ang makakuyog lang sa matag kandidato kay duha so tulo ra sila (sa sulod). Kung naa kay supporters dili diri sa comelec adto sa gawas,” matod ni Castillano sa Superbalita Cebu.
Gimando usab sa Comelec sa mga mo-file sa pag sul-ob og face mask, face shield ug magtamod sa social distancing aron malikay sa pagtakod sa Covid-19 nga padayong naghulga sa pagkakaron sa tibuok kalibotan. (ANV)