MATAG ikatulong Dominggo sa Septiyembre, ang dakbayan sa Danao magsaulog sa kapistahan sa ilang patron nga si Santo Tomas de Villanueva.
Apan sa piyesta ning tuiga, Septiyembre 19, estriktong ipatuman sa lokal nga kagamhanan ang health protocol sa pandemiya sa Covid-19.
Si Danao City Mayor Ramon Nito Durano niluwat og Executive Order (EO) 21 bahin sa pagdili o ban sa pagpamaligya ug pag-inom sa mga ilimning makahubog sulod sa duha ka adlaw, Septiyembre 19 ug 20.
Gipasabot ni Durano nga bisan sa tinguha nga pag sadya atol sa piyesta, dili maayo kon dunay mahitabong kagubot ug masupak na hinuon ang health protocols.
“With the presence of the different Covid variants in the Philippines and considering that the upcoming Home Fiesta celebration will be on the 20th of this month, the possibility of alcohol intoxication is very likely to happen where close contact with other people is a practice during drinking sessions,” dason sa EO.
Ang Danao gikatakda unta nga mosaulog sa Karansa Festival sa pagpahinungod sa patron.
Apan aron paglikay sa tapok nga maghulga sa mga residente sa Covid-19, ipaagi lang sa virtual ang mga kalihukan niini sama sa “Dayon kamo sa Danao” dance contest ug painting contest.
Padayon ang panawagan sa kagamhanan sa mga konstituwente niini nga mosunod sa tanang health protocols aron malikay sa sakit.
Sa uwahing ihap sa City Health Office sa Septiyembre 10, adunay natala nga 128 ka mga aktibong kaso sa Covid-19.
Sa kinatibuk-an, moabot sa 1, 294 ang kinatibuk-ang kaso diin 1, 058 na ang naka-recover samtang 108 na ang namatay. (ANV)