“Oh babe... isang tingin mo la-a-a-aang!”
Usa lang ni sa mga classic hits sa pop duo nga Singsing atol sa kasikatan sa Manila Sound niadtong mid-70s nga maoy naka-impluwensya aron mahimugso ang Original Pilipino Music (OPM).
Ang “Oh Babe” nga gi-composed ni Renee Santos gikan sa 1978 debut album sa Singsing sa Blackgold Records diin lakip sa ilang signature hit ang “Usapan” nga gihimoan usab og version nilang Tito, Vic & Joey nga giulohan og “Upakan.”
Ang Singsing mao ang real-life couple nga Jun ug Beth Marbella nga karon pareho nang mga senior citizen.
“We are now based in my hometown in Legazpi, Albay. We’re still active in singing pero by occasion na lang,” butyag ni Jun sa Superbalita Laysho dihang ato ning nahinabi sa Facebook messenger.
“Puwede pa ba? Forgotten na kami... long time ago. Actually nanahimik na kami. Ayaw na ng misis ko. Mas masarap pala ang ganito. Hahaha...” dugang pa niya dihang ato siyang gihangyo nga ma-feature sa SuperKa.
Hinuon wa siya magmakuli nga ipaambit ang pipila sa mga trivia sa “Singsing” nga katulo gipasidunggan niadto sa Aliw Awards pag-1978, 1979 ug 1984.
“Kumakanta kami noon sa Bodega folk house sa Mabini, when Vic del Rosario saw us. Hayop sana ang name namin dahil hayop daw kaming kumanta. But we changed it to a more decent name which is Singsing. Because she sings and I sing kaya yun Singsing.”
Dili pa sila uyab ni Beth dihang nagsugod ang ilang tandem apan tungod kay pareho silang passionate sa musika mao nga dali ra silang nagkasinabot.
“Friend lang kami noon at nag-request ako sa owner ng pub na bigyan ako ng alternate. Yun si Beth ang binigay then we practiced for months. Pagpunta namin sa Maynila gf ko na siya. Six years bago kami nagpakasal.”
Ang ilang kaminyuon gitugahan og upat ka mga anak nga puros lalaki diin duha niini kaluha ug duna na sad silay tulo ka mga apo.
Bisan sa abroad in demand niadto ang Singsing mao nga mas nidako ang ilang mga anak sa kiliran sa ilang lolo nga amahan ni Beth.
“Seldom lang kami magkita kasi 26 years kami sa Hong Kong at three years sa Shanghai. Yearly lang kami kung umuwi. Kaya two weeks lang namin sila kapiling. Pero ngayon sa bahay na lang kami kasama ang mga apo,” matod sa magtiayong Jun ug Beth Marbella. /
WADAB: Si Nonoy Tan (nagbarug, ikaduha gikan sa tuo) ug ang bandang Wadab./ PINOYGROOVES
Usa usab sa nakahimog pangan sa Manila Sound ang Pinoy band nga “Wadab” nga gitawag nga The Stylistics of the Philippines tungod sa ilang falsetto nga estilo sa pag-awit sama sa signature hits nilang “Pag Tumatagal Lalong Tumitibay,” “Iniibig Kita” ug “Tsismis Ka.”
Ang Wadab mao ang binali sa Davao kon diin sila gikan. Ang ilang bokalista, lead guitar ug composer sa ilang mga kanta nga si Nonoy Tan o Arturo Lui-Pio mao usab ang kompositor sa “My Love Will See You Through” ug “You Made Me Live Again.” Iyang anak si Champ Lui-Pio sa bandang Hale.