SUPERBALITA CEBU

Balak: Inigkanaas sa mga dahon

JESSABELE G. BENTAZAL

Boljoon, Cebu


Gibitad ko sa sonata sa mga gangis paingon

sa punoan sa Mahogany diin nagparada ang

among mga sakyanan nga gi-anayan na –

mga palwa sa lubi nga hanglas kaayong lingkuran,

nalabni sa iyang punoan dihang among gitabyogan.

Unya nasangit ang akong mga mata sa labong

na pod nga kakugnan nga kanhi gidaigan sa sipat

kong mga higala tungod sa kalagot kay sa higayong

modalus-os na mi sakay sa among palwa,

madalin-as mi lahos sa kakugnan ug ang hait

nga mga suwab sa kugon mosamad sa among mga mata.

Sa ubos sa bakilid nagtindog pa gihapon ang Mangga

nga maoy among sak-an kon pul-an na mig dalus-os

sakay sa mga dahong laya sa lukay nga mokanaas.

Apan hain na man sila? Ang mga amigo sa akong kabatan-on?

Dili ko sila mahikalimtan kay sa matag kanaas sa mga dahon

makit-an ko dayon ang dagway sa mga batang malipayon

bisag ang gisul-ob nga sinilas ug purol gisi ug busluton.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!