SUPERBALITA CEBU

Kinatibuk-ang P1M ihatag sa Daanbantayan sa unang 3 ka barangays nga makabakunag 70%

PINALAHI nga incentivized program ang gipatuman sa lungsod sa Daanbantayan, amihanang Sugbo ang giandam aron pagdasig sa mga barangay sa pag-aghat sa ilang mga lumolupyo nga magpabakuna batok sa coronavirus disease 2019 (Covid-19).

Dunay kinatibuk-ang P1 million nga budget alang sa mga proyekto ang gitagana sa lungsod alang sa unang tulo ka mga barangay nga makapabakuna sa 70 porsyento sa ilang mga lumolupyo.

Ang unang barangay makadawat og P500,000 samtang ang ikaduha P300,000 ug ang ikatulo P200,000.

Matod ni Mayor Sun Shimura nga nahinabi sa SunStar Cebu nga ang pundo kuhaon sa 20 porsyento nga development fund nga mobalor og P8 million nga gitagana alang sa 'Aid for the Barangay' alang sa mga proyekto sa imprastruktura sa 20 ka mga barangay sa lungsod.

Sigon pa ni Shimura nga iyang gihimo ang programa human nipahibawo ang Visayas Vaccination Operation Center (VVOC) nga apil ang Daanbantayan sa 17 Top Priority Municipalities sa probinsya sa Sugbo alang sa bakuna.

Dugang pa sa mayor nga daling gipatawag niya ang iyang mga kapitan pinaagi sa usa ka zoom meeting alang sa incentivized program.

Malaumon si Shimura nga sa Disyembre adunay madeklarar nga mananaog ug i-release na usab niya ang pundo alang niini.

"Karon lang nako ni gipagawas, kay lisod kaayo magpremyo ta nya walay sufficient vaccine. But now, with the meeting with the VVOC nga naa gyud tay allocation, ako nang gi-lay on the table with our program," matod ni Shimura.

Gilauman usab ni Shimura nga adunay daghang bakuna ang moabot sa iyang lungsod ug makab-ot na nila ang target nga 1,000 ka residente ang mabakunahan matag semana.

Gisugdan sa Daanbantayan ang mobile vaccination rollout niadtong Martes sa tulo ka clustered barangays nga mao ang Malbago, Calape ug Bateria.

Samtang niadtong Miyerkules, 200 doses sa bakuna ang gidala ngadto sa isla sa Malapascua alang sa mga trabahante sa turismo ubos sa A4 category.

Sigon ni Shimura nga 300 doses ang unang nahatag sa mga senior citizen sa Malapascua.

Dugang ni Shimura nga sa Huwebes Sept. 16, vaccination rollout himuon sa mga Barangay Poblacion, Agujo, Pajo ug Malingin.

Samtang karong Biyernes, Sept 17, mamakuna sa dagkong mga barangay sa Maya, Tapilon ug Logon.

Nakadawat og 1,100 doses sa bakuna ang Daanbantayan niadtong Lunes, Sept. 13 ug gitagalan sa VVOC nga mahurot sa usa kasemana.

Plano usab ni Shimura nga dugangan og usa ka vaccination site ang kasamtangang lugar sa pagpamakuna sa cultural center.

Subay niini, gikalipay ni Shimura ang paghangop sa iyang mga konstituwento sa bakuna ilabi na sa mga isla sa Carnasa ug Malapascua, diin dunay mga testemonya nga panagsa na nitunga ang ilang hubak human nabakunahan batok sa Covid-19.

"They are very positive noh. Everybody is looking for the vaccines. Mao gani to nga gipadaganan gyud nako ang Malapascua and next schedule in Carnasa. There are positive feedbacks of the vaccine. Naay uban nga sa una kuno gipanghubak sila. Paghuman sa bakuna, murag wa na kaayo nibisita ang ilang hubak," matod ni Shimura.

Sigon pa ni Shimura nga posibleng ang kahinay sa signal ug internet connection ang hinungdan nga wa naabot ang fake news kabahin sa bakuna ug wa nakaimpluwensya sa iyang mga residente.

Apil na ang mga tawo sa mainland, maayo usab ang response sa bakuna.

Matod ni Shimura nga di na kinahanglan ang incentivized vaccination program alang sa mga senior citizens sanglit wa kini nahadlok sa bakuna samtang adunay P1,000 ug lima ka kilong bugas ang ipanghatag sa katiguwangan gikan sa kagamhanan matag tuig.

Dugang sa mayor nga siya mismo ang moawhag sa katawhan sa mga barangay sa pagpamakuna ilabi na ang iyang kasinatian nga natusukan og Sinovac vaccine.

Matod ni Shimura nga base sa ilang talaan, kasagaran sa mga nagrabehan sa virus mao ang way mga bakuna ug gipadayag kini niya sa iyang katawhan aron maagni sa pagpabakuna.

Sukad sa miaging semana, ang Daanbantayan nakapamakuna na sa 11 porsyengo sa kinatibuk-ang populasyon. Ang Daanbantayan adunay 93,502 total population.

Sukad sa Sept 15, nakatala ang lungsod og 58 active cases, 483 total recoveries, 34 namatay ug mokabat sa 575 ang kumpirmadong nataptan sa Covid-19.(MVE)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!