ANTI-DRUG crusader nga barangay kapitan namatay human giambusan sa Huwebes sa hapon, Septiyembre 16, 2021 sa Sitio Tapon, Brgy Tag-ube, Lungsod sa Compostela, amihanang Sugbo.
Si Jionri Aligato, 40, minyo, kapitan sa Brgy. Kaluangan, Lungsod sa Asturias, wala makaabot sa tambalanan samtang angol ang iyang ig-agaw nga barangay tanod nga si Emidio Aligato.
Si Police Lt. Samuel Negro, hepe sa Compostela Police Station nga nahinabi sa Superbalita Cebu, nagkanayon nga nagtuo sila nga dunay spotter ang ning-ambush sa duha.
Matod ni Negros nga sila Jionri ug Emidio nagsakay tagsa sa ilang motorsiklo gikan sa Dakbayan sa Sugbo padung mopauli sa Asturias.
Ang lugar maoy labing duol nga agianan kon gikan sa dakbayan sa Sugbo.
Pag-abot sa dapit nga awaaw, sa kurbadahon nga bahin sa karsada, gipamusil ang duha sa wa pa mailhing mga gunman.
Gumikan sa kadaghan sa mga samad pinusilan sa kapitan, wala na siya makaabot sa tambalanan.
Si Emidio naa sa usa ka pribadong tambalanan sa dakbayan sa Sugbo.
Narekuber sa crime scene ang tulo ka mga kabhang sa bala sa kalibre.45 nga pistola.
“Naay nagsunod ani nila nga contact sa mi-ambush kay diha sa lugar mingaw unya, kurbada. Akto agi nila, gipauwanag man dayog bala,” dugang ni Negro.
Di pa sila kasulti kon pila ka suspek kay estoryahon pa nila si Emidio.
Si Major Gilfred Baroman, hepe Asturias Police Station nga nahinabi sa Superbalita Cebu, nagkanayon nga nasubo sila sa kamatayon ni Kapitan Aligato.
Gihulagway niya ang Kapitan nga usa ka “anti drug crusader” nga aktibo sa kampanya batok sa illegal nga drugas.
Gumikan sa abag ni Kapitan Aligato, daghang mga planter og marijuana sa ilang barangay nangadakpan.
Nagtuo si Baroman nga may kalambitan sa trabaho niini isip kapitan ug pakigbatok sa illegal nga drugas ang motibo.
“Subo kaayo kay kaabag nato sa kampanya sa drugas, namatay. Daghang nasuko ani niya sa bukid, kanang mga mananom og marijuana. Kay kanang iyang barangay sigihan namog ronda,” dugang ni Baroman.
Gani ang kapitan nasagmuyo kay gidaot sa mga nananom og marijuana.