POSIBLING adto moduwa si DeMarcus Cousins sa China Basketball League sa sunod season.
Matod pa sa taho, lima ka teams sa China ang nangayo sa resume sa 31 anyos nga sentro aron kini mahashasan.
Giingon nga tulo niini ang nagpakita og dakong interest nga mokuha sa iyang serbisyo.
Usa sa maong teams ang giingong adunay dakong financial capability sa CBA.
Hinuon, wa pay nahikyad nga kontrata nga gipadala ngadto kang Cousins, kinsa nalakip sa Los Angeles Lakers championship sa National Basketball Association (NBA) 2019-2020 season.
Ang 6-10 ug 270 lbs. nga sentro maoy ikalima sa overall pick sa NBA 2010 Draft sa Sacramento Kings, ang team nga iyang naduwaan sulod sa pito ka mga tuig.
Nakaduwa siya og duha ka seasons sa New Orleans Pelicans (2016-2018) sa wala pa siya motugpa sa sabakan sa Golden State Warriors.
Ang Los Angeles Clippers maoy pinakauwahing team sa NBA nga iyang naduwaan sa dihang nitapon siya sa team gikan sa hamubong panahon sa Houston Rockets. (JBM)