SUPERBALITA CEBU

Migallen:Hulga sa PBA; rematch ni Pacquiao, Ugas di madayon?

Taym Pa



NAGHATAG og bating timaan sa Philippine Basketball ilabi na sa PBA kining exudos sa atong mga batan-on ug dekalidad nga mga players sa Japan aron adto didto na moduwa sa ilang lega.

Ning uwahi lang, si Dwight Ramos, ang pambato sa Gilas Pilipinas, maoy ikawalong Filipino player nga moduwa sa Japan B League human kini mipirma sa Toma Grouses team. Mikomiter na unta siya nga moduwa sa Ateneo de Manila University sa UAAP apan tungod kay wa pa man gyuy klaro kon kanus-a tugotan og balik sa nasod ang mga amateur sports, nakadesider na lang kini nga dawaton ang tanyag sa Japan.

Ang laing rason kon nganong dali ra maagni ang atong players, tungod sa kadako sa offer sa teams.

Gawas kang Ramos, nauna na didto sila si Thirdy Ravena (San-En NeoPhoenix), Kiefer Ravena (Shiga Lakestars), Juan Gomez de Liano (Earthfriends Tokyo Z), Bobby Ray Parks Jr. (Nagoya Diamond Dolphins), Javi Gomez de Liano (Ibaraki Robots), Kemark Carino (Aomori Wat’s), ug Kobe Paras (Niigata Albirex).

Pero ang akong gikahibugngan mao kining sitwasyon sa kang Keifer Ravena. Duna siyay existing contract sa NLEX Road Warriors ug sa PBA apan sa dihang nakadawat og offer sa Japan, yano ra kini niyang gipirmahan.

Ambot og unsay kasabutan nga mura og gitugotan ra man sab sa NLEX ug ingon man sa PBA nga ibaliwala na lang ang existing contract niini aron makaduwa siya sa Japan.

Kuyaw og mao ni mahimong basehan sa uban nga puwede ra diay mayama-yamaan ang kontrata sa PBA nga ilang gipirmahan kay anytime puwede ra man ning mabasura.

Sabtunon man tuod nga dakong oportunidad sa usa ka atleta nga makadawat og dakong offer, apan dili sab seguro angay nga isugal ug gusbaton ang interest ug reputasyon sa kinatibuk-ang organisasyon.

Kon unsay obligasyon nga nalatid sa kontrata mao unta kini tumanon ug humanon sa dili pa kini motabok ngadto sa lain. Kay kon kini maoy magpermamenti, tingali og ma-moryo-moryo na hinuon ning PBA. Kana bang wa nay klaro ug dili na ka respetuhan.

Kusog karon ang hugonhugon sa Estado Unidos nga dili na interesado ang Cuban fighter nga si Yordenis Ugas nga makig-rematch ni Manny Pacquiao.

Matod pa nga siyento por siyento na nga ang ikontra ni Yordenis sa sunod niyang away ang laing world champion nga si Errol Spence Jr. alang sa unification bout.

Si Spence mao man gyud unta ang orihinal nga kontra ni Pacquiao niadtong Agusto 22, 2021 sa Las Vegas, Nevada, apan napugos kini sa pag-backout sa dihang nadiskobrehan nga adunay kadaot nga mitumaw sa mata niini. Hinungdan nga si Ugas maoy nihulip ug sa wala damha iyang napildi si Pacquiao.

Kon tinuod man gani ning Ugas-Spence unification bout, mapugos si Pacquiao sa pagpangita og laing kontra.

Kanang kontra nga haom ug maghatag og maayong panamilit sa iyang boxing career.

Tinguha man gud sa kampo ni Pacquiao nga bisan pa sa kapildihan ug pangidaron sa fighting senator paawayon pa kini sa katapusang higayon.

Hinuon naa pay daghang mga makontra si Pacquiao nga maingon nato nga ubos ubos niya og kalidad. Naa sila si Amir Khan nga maoy kanhi iyang sparring partner, ug naa usab si Mikey Garcia nga unang gikataho nga mao untay makontra niya.

Mahimong makabintaha man tuod siya sa tapad, pero wa kini magpasabot nga seguro na ang iyang kadaugan.

Importanti kining awaya kay sa mosugot ta o sa dili, makaapekto kini sa pulitikanhong karera ni Pacquiao, kinsa gituohan nga modagan pagka-presidente sa nasod sa umaabot nga piniliay. jun.migallen22@gmail.com


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!