ANG Philippine Drug Enforcement Agency 7 nibutyag nga dako og natampo sa pagtibugsok sa supply sa illegal nga drugas sa Central Visayas ang war on drugs ni Presidente Rodrigo Duterte subay sa tinguha sa International Criminal Court (ICC) nga ilang ipadayon ang imbestigasyon sa administrasyon.
Gitinguha sa ICC nga buksan pagbalik ang imbestigasyon sa war on drugs sa Pilipinas nunot sa alegasyon nga adunay nahitabong extra judicial killings (EJK).
Magsugod sa ilang pakisusi sa 2011 sa dihang mayor pa si Duterte sa Siyudad sa Davao ug 2016 hangtod sa Marso 2019 dihang giingong gihingusgan ang kampanya batok illegal nga drugas.
Si PDEA 7 Director Levi Ortiz nagkanayon nga ang war on drugs dakog natampo sa pagkunhod sa supply sa illegal nga drugas itandi sa nanglabay nga katuigan.
Matod ni Ortiz nga kaniadto, adunay daghang inilang drug lords nga nagpadayon sa ilang illegal nga negusyo apan sa dihang gisugdan ang gubat sa drugas, nangamatay ang dagkong mga durugista ug ang uban na missing ug duany nabalhog sa bilanggoan.
“Dako gyud kaayo ang kalainan nga ang environment nato sa drugas sa miaging panahon. Karon man gud dinhi sa atong region, wala na tay gitawag nga mga drug lord kay pulos nadakpan ang uban ang uban nangamatay ang uban nangawala, so dako ang pagmenos sa supply sa droga tungod sa gipang hingusgan nga war on drugs ni President Duterte. Nya kini pud ang atong law enforcement pud nitaas ang ilang morale kay gisuportaan man sa atong presidente ang war on drugs,” matod ni Ortiz.
Nakatampo usab ang war on drugs sa pag kunhod sa crime volume sa tibuok nasud sanglit usa sa tinubdan sa krimen ang illegal nga drugas man sigun ni Ortiz.
Matod niya nga kon kaniadto daghan ang gipangpusil nga nasaypan nga asset sa mga awtoridad nga mosulod sa mga dapit nga adunay daghang namaligya sa illegal nga drugas, apan karon mga drug user na ang nangahadlok. (AYB)