GIANGKON sa Cebu City Police Office (CCPO) nga naglisod sa ilang imbestigasyon sa mga kaso sa pagpanghulga nga bombahan ang tulo ka mga buhatan sa kagamhanan ning tuiga.
Labing ulahi mao ang nadawat sa buhatan ni Bise Gob. Hilario Davide III sa Legilative Building sa Kapitolyo sa Sugbo niadtong Lunes, Septiyembre 13.
Samtang, ang gihulga mao ang Department of Education (DepEd) Cebu City Division Office sa dan Imus sa Barangay Day-as niadtong Hunyo 28 ug Cebu City Hall niadtong Agusto 27.
Ang nag-unang duha ka mga kaso walay kasulbaran hangtod karon.
Si Police Lieutenant Colonel Wilbert Parilla, deputy city director for operation sa CCPO, nagkanayon nga lisod na sulbaron ang hulga nga nadawat sa buhantan ni Davide sanglit dili na masubay sa kahimanan sa Regional Anti-Cyber Crime Unit 7 ang signal sa numero sa cellphone nga gigamit sa pagtawag.
Bisan pa man niini, matod ni Parilla, mangita sila og mga paagi nga mailhan kon si kinsa ang maong babaye nga nanghulga.
Gibutyag ni Parilla nga wala pa silay impormasyon kung unsay motibo sa mga suspek nganong ilang gihimo ang pagpanghulga.
Gihimakak ni Parilla ang pasangil nga wala giseryuso sa kapulisan ang ilang imbestigasyon sa mga kaso sa bomb threats.
Matod ni Perilla, hugot ang ilang pagpaniid labi na karon nga dunay migawas nga taho bahin sa hulga sa teroristang pagpangatake bisan wala pa kini ma-validate sa intelligence community. (AYB)