ANG Cebu City Government, pinaagi sa Coast Line Management Board (CLMB), mohimo sa ika-5 nga city-wide clean-up drive sa Sabado, Septiyembre 18.
Ang maong kalihukan mao ang dungan nga pagpanglimpyo sa lainlaing dapit sa Cebu City sama sa kasapaan nga manukad gikan sa tibubdan sa sapa paingon sa dagat.
Ang kalihukan magsugod alas 6:00 sa buntag human sa ceremonial opening nga pagahimuon sa Il Corso sa South Road Properties (SRP).
Ang libuan ka mga empleyado sa Cebu City Government ug mga volunteers maoy maglangkob sa pagpanglimpyo sa kasapaan nga pangulohan ni Bise Mayor Michael Rama, elected officials ug mga department head.
Sa miagi nga ika-pat nga coastal ug riverside clean-up sa City Government niadtong Hunyo, nakahakot sila og 13 tons o 13,000 kilograms nga basura sa upat ka oras nga operasyon sa Hunyo 19.
Ang Coastal Management Task Force nga gipangulohan ni Reymar Hijarra maoy nag-organisar sa maong kalihukan sa tinguha nga malimpyohan ang baybayon. (PAC)