PALO, Leyte--Napatay atol sa gilunsad nga manhunt operation sa kapulisan sa Palo, Leyte ang usa ka lalake nga mipatay sa duha ka bata nga iyang humagbos ug nakaangol sa iyang kapuyo ug anak niini.
Ang pagpatay sa duha ka humagbos nahitabo sa Barangay Barayong, Palo, Leyte, pasado alas 7:00 sa gabii, Sabado, Septiyembre 11.
Ang suspek mao si Guillermo Latore, 33, mag-uuma ug nagpuyo sa Barayong, bukirang barangay sa Palo.
Ang duha ka humagbos nga namatay mao sila si Ronillo Rosilio, 15, grade 4 ug Angeline Rosilio, 16, grade 10.
Samtang, ang kapuyo giila nga si Joselyn Rosilio, 33 ug Rhea Mae Latore, 9 ka buwan.
Pag-abot sa kapulisan sa lugar, ilang naabtan si Joselyn, Rhea Mae ug Angeline sa hawanan sa ilang balay nga dunay samad dinunggaban ug napuno sa dugo.
Samtang si Ronillo sa kasagbutan nagtago ug samdan sab.
Pipila ka adlaw sa una pa ang nahitabo ang krimen, magsige og away ang suspek ug kapuyo bahin sa kuwarta.
Matod ni Police Lieutenant Colonel Joselito Villas, hepe sa Palo Police Station, inahan gidala sa Eastern Visayas Medical Center. Ang mga bata sa Schistosomiasis Hospital Center sa Palo apan gideklarar nga dead-on-arrival.
Dugang ni Villas, nakadawat na sila og impormasyon nga naa nagtago sa kalasangan sa Palo ang suspek.
Ug Kagahapon, Septiyembre 16, pasado alas 8:00 sa buntag, napatay ang suspek atol sa manhunt operation sa samang barangay.
Si Barangay Kagawad Joel Jamura maoy nagsilbing giya sa mga pulis padulong sa nahimutangan sa suspek, apan nakurat si Jamura nga nibutho og kalit sa iyang atubangan ang suspek ug gisuwayan siya sa pagtigbas apan wala maigo.
Niresponde si Police Chief Master Sergeant Panfelo Hilum nga gisuwayan sab pagtigbas sa suspek busa napusilan-patay sa kapulisan.(JKDP)