MILUSAD na og sunod-sunod nga mga lihok protesta ang mga kawani sa mga shipyard operator sa Tayud, Consolacion. Ilang gisupak ang planong pag-ugmad og reclamation project sa Kagamhanan sa Lungsod sa Consolacion sa maong barangay. Niadtong miaging adlaw, ang mga empleyado sa Santiago ug Colorado Shipyards ninglusad og protesta. Mokabat sa 3,000 ka mga empliyado ang posibleng mawad-an og trabaho kon masira ang mga shipyard kay ugmaron ang reclamation area.
Ang shipyards dugay na nga nagserbisyo sa marine industry sa Kabisay-an ug Mindanao. Nakatampo kini og dakong buhis sa lungsod sa dugay na nga panahon. Milukat ang mga operator og business permit sa lungsod balig usa ka tuig. Apan Hunyo 2021, giingnan sila ni Consolacion Mayor Joaness “Joyjoy” Alegado nga kutob na lang sila unta niadtong Hunyo gumikan sa tukuron nga reclamation, apan og gihatagan og igong lugway sa korte nga ilang gidangpan.
Ang Lungsod uban sa partnership sa La Consolacion Seaport Development Corp. (LCSDC) mougmad og 234.8 ektaryas nga tubig dagat ngadto sa reclamation area sa Barangay Tayud nga pagatawgon og Seaport City. Kumbinasyon kini sa commercial ug residential complex. Wala lang gani gihimong konsultasyon si Mayor Alegado sa mga apektadong lumolupyo ug walay relocation sa mga maapektuhan.
Ningbahad ang shipyard operators ug mga kawani nga ilang babagan ang proyekto. Matag adlaw sa miaging semana, matag kompaniya, motugot sa ilang mga empleyado nga mohunong og makadiyot sa ilang trabaho aron mopahigayon og lihok protesta. Misalmot usab sa mga protesta ang pipila ka labor leaders ug mga tawo nga nagpakabana sa katilingban.
Gawas sa mga empleyado sa shipyard, ang mga lumolupyo usab sa Barangay Tayud ug mga silingang barangay, labi pa ang mga mangingisda, misalmot usab sa protesta kay maapektuhan ang ilang pangita ug panginabuhian. Samtang si Mayor Alegado nagpakabuta-bungol sa mga sentimento kay gusto niya nga matuman ang iyang ambisyosong proyekto. Wala gani maghuna-huna og relocation sa apektadong mga tawo ug sa posibleng distroso nga mamugna sa iyang reclamation project.