SUPERBALITA CEBU

Barrita: Time out sa pagmabdos sa Lapu-Lapu City

Tikdul-Tikdol

TALAGSAON ang hangyo sa usa ka opisyal ngadto sa mga magtiayon sa syudad sa Lapu-Lapu–ayaw una mo pagmabdos. Sama sa duwa nga basketball, time out una sa pagmabdos sa panahon sa Covid-19 pandemic. Ngano man kaha?

Si Nagiel Banacia, pangulo sa Lapu-Lapu City pandemic response team, niingon nga puno ang ilang mga hospital tungod sa pandemya. Gani, duha ka mga babaye nga positibo sa Covid-19, didto ra manganak sa ilang ambulansiya niadtong Miyerkoles, Septiyembre 15.

Laing babaye nga positibo sa Covid-19 didto sab manganak sa ilang Covid-19 response team ambulance niadtong Septiyembre 11. Sa Agosto, usa ka batang bag-ong nahimugso nagpositibo sa Covid-19 ug namatay sud sa 24 ka oras. Buhi ang inahan.

Matod pa ni Bañacia di maayo nga magmabdos ang mga babaye karon kay delikado nga motakod ang virus ngadto sa ilang gisabak. Apan si Dr. Ozge Tuncalp sa World Health Organization (WHO) niingon nga talagsa ra ang “mother to baby transmission in utero” ug wa pa sila maka-detect og active virus sa gatas sa inahan.

Kon i-oktaba sa magtiayon ang pagmabdos, angay tingaling magpatabang si Bañacia sa Commission on Population (PopCom) 7 nga dunay mga eksperto sa family planning sama sa paggamit og condom, intra-uterine device, calendar method ug una pa.

Dihay magtiayon nga nigamit og calendar method apan nimabdos gihapon ang asawa. Sa dihang gipangutana sila kon giunsa nila paggamit ang calendar method, matod pas magtiayon, “Amo ra man tong gihapin sa banig ang kalendaryo.”

Ang Lapu-Lapu usa ka highly-urbanized city. Panahon na tingali nga padak-an ang ilang city hospital aron maka-accommodate kini sa mas daghang mga pasyente, ilabi na sa panahon sa pandemya nga nasinati karon.

Matod pa ni Bañacia wa silay quarantine facility o birthing center nga eksklusibo sa mga babayeng nagsabak. Ang ilang temporary treatment and monitoring facility sa Lapu-Lapu City College hapit na mapuno ug di kini alang sa mga babayeng nagsabak.

Duna silay gitukod nga bag-ong stepdown facility nga may 280 beds, lakip na sa 10 beds alang sa mga babayeng nagsabak, sa Mactan National High School. Kini adunay birthing center o paanakan. Apan lagi gitukod pa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!