MIABOT na sa 18,193 ang kinatibuk-ang ihap sa mga kumpirmadong kaso sa Covid-19 sa Cagayan de Oro City human usa ka returning overseas Filipino worker ug 101 ka mga residente sa dakbayan ang nagpositibo sa novel coronavirus.
Sumala sa City Health Office, sa 101 ka mga bag-ong lokal nga kaso, 52 ang mga local index, 31 ang mga close contacts sa mga pasyenteng nagpositibo sa coronavirus, 13 ang mga lokal authorized persons outside residence (Apors), usa ang Apor with link, duha ang mga persons deprived of liberty (PDLs), ug duha ang mga patay.
Ang Cagayan de Oro adunay 3,838 ka mga aktibong kaso, 918 niini na-admit sa Northern Mindanao Medical Center ug uban pang mga ospital sa siyudad, 2,905 ang mga outpatient, ug 15 ang mga ROFs/LSIs.
Nakatala usab og 82 nga nakarekober sa sakit. Anaa na karon sa 14,148 ang ihap sa mga nakarekober sa dakbayan.
Ang ihap sa mga namatay sa Covid-19 sa dakbayan anaa na sa 802.