SUPERBALITA CEBU

Rabacal: Kalandrakas sa pulitika

Pakabana

PAGKA-KARON hanap pa kaayo ang kamada sa national ug local nga pulitika. Sa national, ang klaro ra gayud mao ang tandem nila ni Ping Lacson-Tito Sotto. Bisan ang pagdagan ni Presidente Rodrigo Duterte pagka-bise presidente wa pay siguro tungod niining paninguha sa iyang mga diehard kaniadto nga karon nagpaluyo na sa iyang anak nga si Mayor Sara Duterte Carpio. Gilusad na nila ang “Hugpong Para kay Sara” pinaagi sa Run, Sara, Run ug Stop, Digong, Stop.

Ang pipila ka mga dagkong lider sa kahugpongan mao sila si House Speaker Lord Allan Velasco, dakong opisyal sa PDP-Laban nga usa sa mga miindurso kang Digong Duterte nga molansar pagka-bise presidente ug ang kanhi niya pangabaga nga si former mayor Leoncio Ibasco, Jr. Kon dili na modagan ang amahan, mahimo nang molansar si Inday Sara.

Si Senador Manny Pacquiao gipaabot usab nga mahinayon gayud pagdagan pagka-presidente. Si Mayor Isko Moreno nga gituhoang maoy mahimong bise ni Pacquiao, gusto na usab nga mag-presidente. Si Bongbong Marcos presidente gayud ang lansaran. Wa pa usay siguro si Bise Presidente Leni Robredo kon unsay daganan. Kon adunay unom o bisan lima ka mga kandidato pagka-presidente, nagkinahanglan usab sila og lima ka mga kandidato sa pagka-mayor nga maoy modala sa ilang kampanya.

Dinhi sa siyudad sa Sugbo murag mabungkag gayud ang Barug-PDP kay si Joey Daluz gituhoan man nga mulansar pagka mayor batok kang Bise Mayor Mike Rama. Gipaabot nga siya maoy mopuli sa kandidatura unta ni Mayor Edgardo Labella. Nasayran nga nagsige na og suroy sa mga barangay ang mga lider nga namugos sa mga botante alang kang Daluz. Siya maoy modala sa kampanya kon si kinsa sa mga Duterte ang mulansar. Sa BO-PK walay away kay si kanhi mayor Tomas Osmena man maoy magbuot kon kinsay padaganon sa naglainlaing posisyon. Kon wala mausab ang baruganan ni Osmena siya maoy modala kang Pacquiao dinhi sa Sugbo. Si Rama kaha maoy modala sa Lacson-Sotto tandem? Kinsa may mopaluyo kang Marcos, Robredo ug Moreno? Kon mahinayon, alegre kining piniliay dinhi sa Sugbo. Daghan na tingaling mga ambisyoso nga naghunahuna na nga moitsa usab sa ilang kawo sa local election.

Uyon akong bungkagon na kining Inter-Agency Task Force for the Management of Emerging Infectious Diseases (IATF-EID) ug itugyan kini ngadto sa local government units (LGUs). Ang mga mayor ug gobernador maoy adunay close contact sa ilang mga lumolupyo ug nasayud kaayo kon unsay problema sa panglawas ug sa panginahanglan sa iyang mga kunstituwente. Kining IATF centralized ra kaayo nga dili masayud sa angay buhaton sa matag lungsod ug dakbayan. Mao nga usahay dili magkadimao ang ilang mga desisyon.

Magduha na ka tuig kining IATF apan halos wala man gihapoy epekto ang ilang gihimo. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph