PAHAYAGON og suway sa magsuong puwersa sa Magnolia Ang Pambansang Manok Hotshots ug San Miguel Beermen ang ilang poruhan sa inilugay sa nahabiling usa ka luna sa top two spots sa ilang pagpakigbatok og lainlaing kontra karong adlawa, Septiyembre 17, 2021, sa krusyal nga bahin sa Philippine Basketball Association (PBA) 2021 Philippine Cup sa Don Honorio Ventura State University Gym sa Bacolor, Pampanga.
Ang Hotshots, nga kasamtangang naa sa ikaduhang dapit dala ang 6-3 nga rekord, makigbatok sa NorthPort Batang Pier sa premirong duwa karong alas 12:30 sa udto.
Samtang ang Beermen, nga naa sa ikaupat nga dapit bitbit ang 5-3 nga rekord, makigharong sa Phoenix Super LPG Fuel Masters sa ikaduhang duwa karong alas 3:00 sa hapon.
Importante ang pagsulod sa top two spots human sa elimination round gumikan kay maghatag kini og twice-to-beat nga bintaha sa quarter-finals.
Ang league-leader Talk N’ Text Tropang Giga (9-1) maoy unang nakaangkon og puwesto sa top-two human nila gipangmakmak ang Batang Pier, 102-92, niadtong Miyerkules.
Kon buot hunahunaon, mas importante alang sa Batang Pier ug Fuel Masters nga modaog ning higayuna gumikan kay ang kapildihan posibleng magtukmod kanila sa panamilit.
Ang Batang Pier naa sa ikaunom nga puwesto dala ang 4-4 nga rekord samtang mas kuyaw ang kahimtang sa Fuel Masters kay naa kini sa ikasiyam nga lugar dala ang 4-6 nga rekord.
Sa main game, magsangka ang defending champions Bgry. Ginebra Gin Kings ug Alaska Aces karong alas 6:00 sa gabii.
Delikado sab ang sitwasyon sa Gin Kings nga anaa sa ikawalo nga dapit dala ang 2-5 nga rekord samtang ang Aces naa sa ika-10 nga puwesto bitbit ang 2-4 nga rekord.
Kon buot hunahunaon, gubot pa sa lukot ang senaryo ug nagdepende pa ang tanan sa resulta sa nahabiling mga duwa sa elimination round una masayran ang walo ka teams nga molangkob sa nagkaduol nga quarter-finals. (ESL)