SUPERBALITA CEBU

Super Suroy: Barko nagbunta-og sa bukid

KATUOHAN, dili. Tuo nalang aron ta madali.

Gawas sa lapad nga planstasyon sa dragon fruit ni Master Mariner Elmer Montebon, 53 nisantop sa iyang huna-huna nga motukod og barko isip inspirasyon sa iyang pamilya tungod kay mao kini ang iyang panginabuhi-an nga usa ka seaman.

Niadto lang buwan sa Disyembre 2020, nahuna-hunaan ni Montebon, lumad nga taga-Lungsod sa Borbon, Probinsiya sa Sugbo nga nagsugod og sakay sa barko niadtong 1997 isip ordinaryong seaman, hangtod nga nahimong kapitan sa barko niadtong 2014.

Samtang didto siya sa lawod sa laing nasod nga nagtimon sa cargo ship nga iyang gimaneho, nasulod sa iyang hunahuna ang pagbuhat og barko ug nakigtambatayong sa iyang ig-agaw nga kapitan sa barangay nga si Henry Montebon sa Bugdong Gua kinsa adunay talento sa drawing, painting, landscape , design ug daghan pang uban.

Dinhi na nahimugso ang SV Masters Dragon Peak(SVMDP) nga gipahaom sa iyang propesyon isip usa ka master mariner permanenteng gi-angkorahe ibabaw sa bukid sa Sityo Manga, Barangay Bili, Lungsod sa Borbon nga adunay 77.2 kilometros ang gilay-on gikan sa Cebu City.

BLESSINGAN KARON

Niadtong Setyembre 15, pormal nang gi-inagurahan ang Sailing Vessel (SV) MDP nga nahimutang mga 200 metros ang gihabugon gikan sa tiilan sa bukid nga adunay 360 views diin masud-ong ang ka-anindot sa kina-iyahan ug makahanggap sa labing preskong hangin sa bakukiran.

Ipahigayon ang blessing karong adlawa, Septiyembre 17, samtang ugma adlaw nga Sabado mao na ang pagdawat sa SVMDP og mga bisita niadtong buot mosud-ong sa iyang katahom.

Gawas sa maong atraksiyon, si Montebon adunay 2,000 ka punoan sa dragon fruit sulod sa 6.5 ka ektarya nga bukid sa barangay Bili diin nahimutang ang maong barko nga inspired sa Pirates of the Carribean nga gibidahan ni Johnny Depp sa papel nga Captain Jack Sparrow.

Ang SVMDP ni ship captain Montebon daw susama gyud sa usa ka tinuod nga barko nga gi-angkorahe inay sa kadagatan apan diha ibabaw sa bukid, sanglit aduna kini bridge, mast, forecastle, anchor nga maoy mga basic parts sa usa ka barko.

Sa duha ka kilid sa barko, adunay desinyo sa higanteng bunga sa dragon fruit, hilaw ug hinog samtang ang atubangang bahin niini adunay buwak sa dragon fruit nga mosiga panahon sa gabii.

Ma-experience sab sa mga bisita ang lami-an nga dragon fruit shake nga freshly pick gikan sa gipanag-iya nga farm ni Montebon.

Sa mosunod nga mga buwan, magtukod usab og dako nga swimming pool si Montebon ug iyang plano ibutang niya kini ibabaw usab sa bukid.

Makita usab ang higanteng takubo atubangan sa barko diin mahimong maka-chill ang mga bisita, adunay corals sa ubos niini, star fish, sea turtle ug kugita.

Sa ubos nga bahin niini, naa didto ang manobela sa barko diin mahimo usab nga maka bonfire o camp fire ang mga bisita kansang lugar haom usab sa camping, pre-nup, birthdays ug ubang kalihokan.

Gikan sa entrance sa SVMDP, makita ang barko nga gi-angkorahe kon adunay drone shot diin ang mopaingon sa barko nga mahimutang ibabaw sa bungtod adto moagi sa gibutangan sa angkla diin nagpalibot niini ang mga buhing bato nga daw sama kahapsay ug ka patag sa sementado nga dalan dayon tikang sa hagdanan nga daw nagsilbing kadena sa angkla hangtod moabot sa barko.

BARKO SA KINABUHI

“Amo ning nahunahunaan kay ang akong uma, naay daghang dragon fruit ug ang among family is inspired by seafearers unya moabot unya ang panahon nga dili nami makasakay og barko , naghimo nami og among barko,” padayag ni Montebon.

Gihulagway sa master mariner nga wala pa mahuman ang development sa SVMDP sanglit magpadayon pa ang paglambo sa lugar, uban sa pagtukod sa mga cottage, swimming pool para maka-atiman sa gustong mopahimulos sa ilang pasilidad.

Siguradong patok sa matag pamilya, barkada ug kadtong adunay hinigugma.

Tana, suroyon ta ang SVMDP as a friend. /


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph