ANAA na sa 80 porsyento ang recovery ni Mayor Edgardo Labella human siya naigo sa sepsis ug gisundan sa mild stroke sa nakalabay nga mga buwan.
Kini ang gipahibawo sa iyang kamaguwangan nga anak, Edgardo Labella II, o mas naila sa tawag nga Jaypee, human iyang gipahibawo ang publiko sa nasinati sa mayor sa dakbayan sa Sugbo.
"I would just like to clarify that the mild stroke happened to my father occured simultaneously with his sepsis last June. The mayor is getting a lot better now but still recovering at a better rate and is still in therapy," padayag ni Jaypee.
Ang batan-on nga Labella nagkanayon nagkinahanglan pa gihapon nga magpabilin sa balay ang iyang amahan apan magpadayon sa pagtrabaho bisan naa ra sa pinuy-anan.
Matod ni Jaypee nga nagpadayon ang rehabilitasyon sa iyang amahan aron hingpit nga maulian ug makabalik na og trabaho sa City Hall.
Samtang si Bise Mayor Michael Rama nagkanayon nga kon mohukom si Labella nga mag-leave, anaa ra siya kanunay nga andam mobanos isip acting mayor aron maoy motrabaho sa mga asikasuhonon sa usa ka local chief executive.
Anaa usab silang Konsehal Dondon Hontiveros nga maoy magsilbing acting mayor ug mga senior city councilors nga mga third termer sama nilang Konsehal Dave Tumulak nga motabang sa administrasyon.
Si Jaypee nagkanayon nga prayoridad karon sa ilang pamilya ang maayong panglawas ni Labella ug wala sila maghunahuna sa umaabot nga piniliay.
Si Jaypee giapil sa line-up ni Bise Mayor Michael Rama pagka-konsehal sa north district human sa iyang pagdeklarar nga molansar sa 2022 elections pagka-mayor sa siyudad.(PAC)