MAHULOG nga pahinumdom na lang ning akong lindog karon kay nasulat na man ni nako sa una.
Ang una mao ang unang bahin sa tulo ka yugto nga konserto ni Julie Ann San Jose nga “Limitless: The Musical Trilogy” nga isalida na karong adlawa sa mga digital platforms sa GMA 7.
Ang unang yugto gitawag og “Breathe,” ang ikaduha “Heal” ug ang ikatulo “Rise.”
Ipahibalo ra unya ang mga petsa sa nagsunod nga mga yugto.
Ang ikaduha mao ang grand finals sa “Tawag ng Tanghalan 5 Huling Tapatan” nga ipahigayon sa “It’s Showtime” sa A2Z channel sa free TV ug digital TV boxes, Kapamilya channel sa cable ug satellite TV, Kapamilya Online Live sa YouTube channel ug Facebook page sa ABS-CBN Entertainment, ug sa iWantTFC app (iOs ug Android) ug sa iwanttfc.com.
Ang magtigi mao sila si Anthony Castillo, Froilan Cedilla, Gem Christian, Lorraine Galvez, Aixia Mallary, Psalm Manalo, Adrian Manibale ug Reiven Umali alang sa grand prize nga yuta ug balay balor og P2.3M, recording contract sa ABS-CBN music, management contract ubos sa Polaris sa Star Magic ug tropeo nga gi-desinyo Toym Imao.
***
Bag-o lang mi nagkaila ni Ate Ging pero dugay na ni siyang magkantahan sa CCTN ug dayon sa Facebook Live account ni higalang Sam Costanilla.
Nagkaila mi pormal niadtong pagtambong nako sa linawas pa nga tigom sa Music Lovers of Cebu.
Wa na to masundi tungod sa mga restriction kalabot sa health protocols.
Karong semanaha, gipahibawo ni Sam nga nibiya na si Ate Ging ning kalibutana.
Human niini, nakaingon ko nga di na una ko mosuwat og mga mensahe nga “condolence.”
Nigamit na lang kog sad emoji ug kamot nga nagsimbolo ug pag-ampo.
Makapasubo na kaayo ang mga panghitabo, pero di lang gyud ta mopalta ug hangyo sa Labawng Makagagahom sa iyang panabang.
***
Dugay na ni nakong gipangandaman mga tulo na ka tuig, kapin kon kulang, nawagtang ang akong lindog nga Sounds & Images sa inahang mantalaan ning SuperBalita nga Sun Star Cebu.
Nakaingon ko nga sa madugay ug sa madali, mosunod gyud ning akong Kyaw-Kyaw sa pagkahulog sa linaw, pagkatunaw ug dayong kahanaw kay sumala pa ni Dodong Morallo, nagkahinay na ang industriya.
Mao nga pinaagi ning lindog, manamilit ko ninyo mga mambabasa nga “ni-agwanta” nako sa pila ka tuig.
Ako na gyud pukawon ang nahinanok nakong blog nga Kyawero de Cebu.
Pangitaa lang ninyo.
Wa koy mahims! Babu!