Orcollo, Biado laing duha sud sa roun-of-16

NAGPADAYON sa pagpangutlo og kadaugan ang Surigaonon nga si Dennis Orcollo aron pangulohan ang laing tulo ka mga Pinoyng tirador nga milatas na paingon sa round-of-16 sa nagpadayon nga 2021 US Open Pool Championship sa Atlantic City, New Jersey Huwebes (Biyernes sa buntag sa Pilipinas).

Uwahing gibiktima ni Orcollo, kanhi kampiyon sa Superbalita 9-Ball Challenge, si Oliver Szolnoki sa Hungary, 11-6.

Ang laing kataganasod nga milabni usab og luna alang sa sunod hugna mao sila si Johann Chua, Carlo Biado ug Rodrigo Geronimo.

Si Chua mipakaging ni Mieszko Fortunski sa Poland, 11-7, aron usab pagprotehir sa iyang limpiyong baraha.

Samtang sila si Biado ug Geronimo miagi una sa losers' bracket una pa sila makabaton og lingkuranan sa round-of-16 sa dihang mikutlo usab sila og sunodsunod nga kadaugan.

Gipildi ni Biado si Jeff Luna sa All-Pinoy showdown, 11-6, ug dayon gisunod pagpukling ang taga Scotland nga si Jayson Shaw, 11-8.

Sa iyang bahin, si Geronimo human mapildi ni Max Lechner, 11-2, nag maoy naghatod kaniya sa losers' bracket, mibangon ug mipakaging sa inilog nga si Neils Feijen sa Netherlands, 11-6.

Sugdan sa Biyernes (Sabado sa Pilipinas) ang round-of-16 sa torneyo nga nagtangag og ganting salapi nga P300,000 diin ikasangka ni Orcollo si Mario He sa Austria samtang ikabagat usab ni Chua si John Morra sa Canada.

Mosuway usab pagsulod sa quarterfinals si Biado batok ni David Alcaide Bermudez sa Spain ug ikasangka usab ni Geronimo ang taga Estonia nga si Denis Grabe. (JBM)