NAPUNO sa pagsaway si World Boxing Council (WBO) bantamweight champion Johnriel Casimero gikan sa boxing fans, netizens lakip na niini ang laing Filipino world champion nga si Nonito Donaire gumikan sa komentaryo niini nga “mura robot” si Hall of Fame trainer Freddie Roach.
Si Casimero, 31, nibuhi ning maong komentaryo sa YouTube vlog (RichDon TV) diin siya maoy pinasidunggang dinapit.
Tataw nga ang buot ipasabot ni Casimero mao ang kangakanga nga sinultihan ni Roach nga resulta sa iyang kondisyon nga Parkinson’s Disease.
Si Casimero gi-train ni Nonoy Neri, usa sa mga trainer ni Filipino boxing legend Manny Pacquiao, kinsa dili ikalimod nga nahanas og maayo gumikan sa paggiya ni Roach.
Apan bisan pa ning maong kamatuoran, nakaako gihapon si Casimero pagbuhi sa maong komentaryo nga alang sa kadaghanan, usa ka pagbugal-bugal ngadto kang Roach.
Matod pa ni Casimero nga wala siya nangandoy nga magpa-train kang Roach, kinsa nag-edad na og 61.
“Siyempre gusto ko Pilipino. Hindi kami magkaka-intindihan nun,” matod pa ni Casimero.
“Tapos yung pagsasalita pa hindi pa gaanong marinig. Rarrrrrrrr. Parang robot.”
Ang netizens dali nga nakapagawas og reaksyon niini–kadaghanan pulos nangasagmuyo--ug nag-viral dayon ang komentaryo sa lumad nga taga Ormoc City, Leyte.
Si Donaire, 38, kinsa maoy naggunit sa World Boxing Council (WBC) bantamweight title, usa sa mga ningpadayag sa iyang kapungot ning maong isyu.
“That was sad. Freddie is not only a legendary trainer, but also a human being,” asoy ni Donaire sa usa ka interbyu nga napatik sa Spin.ph.
“You don’t make fun of someone like that. Not about health. Especially in this sport we are in, you don’t know when karma will come back around.” (ESL)