ARON paghatag og igong proteksyon sa professional boxers, ang Games and Amusement Board (GAB) nipagawas og kamanduan nga ang tanang mga boksidor nga moaway sa Pilipinas ipaubos sa hematoma screening matag human sa ilang tagsatagsa ka away.
Kini maoy gibutyag ni Dr. Radento Viernes, ang hepe sa GAB Medical Section atol sa TOPS Usapan Sports online forum niadtong Huwebes, Septiyembre 16, 2021.
Matod ni Viernes nga ang ahensiya aduna na karon upat ka brain hematoma screening devices nga giapod-apod sa mga sangang buhatan niini sa Luzon, Visayas, Mindanao ug National Capital Region.
Ang maong ekipo nagamit na sa unang higayon niadtong Septiyembre 4, 2021 sa usa ka boxing event sa Urdaneta, Pangasinan diin ang 20 ka mga boksidor nga mipakita og aksiyon sa maong away ang libring gipa-scan, pagbutyag ni Viernes.
Dugang ni Viernes nga ang portable nga ekipo adunay infrared technology aron maoy mo-screen o mo-monitor sa mga dugo ug ubang mga bun-og sa boksidor human sa away.
Hinuon iyang giklaro nga kini dili isipon nga usa ka CT scan ug dili eksklusibo lang sa boxing.
Ingon niya nga magamit usab kini sa mixed martial arts ug ubang mga combat sports.
Mahimo usab sa basketball ilabi na kon dunay mabunal sulod sa korte ug ingon man usab sa motocross kay bisan pa og dunay helmet ang rider sa ilang pagkalamba, posibli nga magkamugna kini og trauma.
Sa samang higayon, subling gipahibawo sa GAB ang ilang pag-host sa 3rd Professional Sports Summit ning buwan sa Septiyembre. (JBM)