MODAGAN si Davao City Mayor Sara Duterte-Carpio sa 2022 election, apan sa sama gihapon nga posisyon.
Kini maoy gikompirma sa SunStar Davao sa tigpamaba ni Duterte-Carpio, Liloan Mayor Christina Frasco, sa text message niadtong Huwebes sa gabii, Septiyembre 16, 2021.
"Yes, this is confirmed. According to Mayor Sara, she will run for reelection as Davao City mayor," tin-aw ni Frasco.
Si Frasco nagkompirma sab nga si incumbent vice mayor Sebastian Duterte modagan alang sa samang posisyon sa 2022.
Si Duterte-Carpio nagkompirma sab niini ngadto sa media atol sa iyang pagbisita sa Bakuna By the Sea vaccination activity sa Waterfront Hotel niadtong Biyernes sa hapon, Septiyembre 17.
"I can confirm the announcement of Frasco," sigon pa niya.
Iyang gikompirma sab nga ang iyang igsuon nga si Sebastian maoy "overall organizing person in the joint campaign of her regional party Hugpong ng Pagbabago (HNP) and Hugpong sa Tawong Lungsod (HTL)," isip maoy gikasabutan sa mga miyembro sa partido.
Ang mayor giubanan ni Senador Sherwin Gatchalian nga personal nga nagpasalamat sa vaccination organizers ug medical workers sa pagdumala sa kalihukang pagbakuna, nga nagtumong sa pagbakuna sa gibana-bana nga 25,000 ka economic frontliners.
Gikompirma sab ni Duterte-Carpio nga siya ug si Gatchalian naghisgut og politika atol sa ilang paniudto.
"Kapag magkakasama ang mga politicians, politics really dini-discuss 'yan," tug-an niya. Nibalibad siya nga dugangan pang ibutyag ang ilang gihisgutan.
Wala sab niya gitubag og direkta ang pangutana sa posibleng "switching" sa presidential nominations, sama sa nahitabo sa iyang amahan, Presidente Rodrigo Duterte, atol sa 2016 elections.
Nagdeklara na si Duterte-Carpio nga di siya modagan sa taas nga posisyon bisan sa panawagan sa iyang mga suporter.
Apan mga suporter sa mayor wala pa mawad-i og paglaum.
Grupo sa mga molupyo nga Hugpong Para kay Sara (HPS) niadtong Huwebes, Septiyembre 16, nagsulti nga ilang pahimuslan ang nahabilin pang mga adlaw una ang pagduso sa certificate of candidacy sa Oktubre aron nga ikombinser si Presidente Duterte nga di idayon ang iyang plano nga modagan sa pagka-bise presidente.
Si Davao Occidental Governor Claude Bautista, usa sa mga miyembro sa Ituloy ang Pagbabago Movement, nagsulti sab nga duna pay daghang panahon una ang eleksiyon.
"Layo pa kaayo ang election. Anything can happen. I always believe in God's will!!! What is important is that she has the desire to serve the people and everything will follow. We believe in her leadership and I will always believe in her and I will always be her avid fan no matter what now and forever... [sic]," pahayag ni Bautista.
Si Davao del Norte Governor Anthony del Rosario, HNP secretary general, nagsulti sab sa miaging text message nga si Duterte-Carpio gilaumang mohukom sa iyang plano sa politika alang sa 2022 atol unya sa pagduso sa certificate of candidacy.