TALIWALA sa iyang kapildihan sa labing ulahi niyang away, taas gihapon og rating sa iyang weight division si Filipino boxing legend Manny Pacquiao sa bag-ong nigawas nga world rankings sa gitawag og bibliya sa boksing nga mao ang Ring Magazine.
Si Pacquiao, kinsa nasugamak sa unanimous decision nga kapildihan batok kang World Boxing Association (WBA) welterweight king Cuban Yordenis Ugas niadtong Agosto 21, 2021 sa Las Vegas, nagpatong sa ikalimang puwesto sa welterweight divisional ranking.
Ning maong timbang, nagpadayong No. 1 si World Boxing Council (WBC) ug International Boxing Federation (IBF) champion American Errol Spence Jr., ikaduha si World Boxing Organization (WBO) king American Terence Crawford, ikatulo si Ugas unya ikaupat ang kanhi world champion nga si American Shawn Porter.
Adunay laing siyam ka Pinoy mga boksidor ang ningsaka sa division ranking nga gipangulohan nila ni WBC bantamweight champion Nonito “Filipino Flash” Donaire ug WBO bantamweight titlist Johnriel Casimero.
Ang kampyon ning maong timbang mao si Japanese “Monster” Naoya Inoue, kinsa maoy No. 3 sa pound-for-pound rating.
Ang ubang mga Pinoy nga nakasulod sa divisional ranking mao sila si Vic Saludar, Rene Cuarto, Pedro Taduran, Melvin Jerusalem, Jerwin Ancajas, Donnie Nietes, ug Mark Magsayo. (ESL)