GIANGKON sa lokal nga panggamhanan sa probinsiya sa North Cotabato nga naglisud sila sa contact tracing sa mga nakauban sa lima ka tawo nga nagpositibo sa Delta variant sa Covid-19.
Sumala sa Integrated Provincial Health Office (Ipho-Cotabato) ug Inter-Agency Task Force nga kinahanglan nga ma-quarantine ang second to third generation contact sa mga pasyente.
Kahinumdoman nga moabot na sa unom ka tawo ang nagpositibo sa Delta variant sa probinsiya.
Kini gilangkuban sa duha gikan sa Kidapawan City, tag-usa sa M'lang, Tulunan, Pikit ug Aleosan.
Giangkon sa mga opisyal sa matag local government unit nga dunay nataptan sa Delta nga bag-o pa miabot ang resulta nga gipadala sa kaulohan sa DOH apan human na sa 14-days quarantine ang mga pasyente.
Ang uban kanila nakabalik na sa ilang trabaho, ilabi na sa ilang matag pamilya.
Gumikan niini, gipalapdan sa Integrated Health Office sa North Cotabato ang contact tracing ug ipailawom dayon sila sa quarantine.
Gihangyo sa mga frontliners ang katawhan sa North Cotabato nga disiplinahon ang ilang kaugalingon ug sundon gyud ang minimum health protocols batok Covid-19.