MGA 50 ka trabahante sa Fooda Saversmart General Maxilom branch nilusad og silent protest batok sa management sa supermarket sa Biyernes, Septiyembre 17, 2021.
Matod ni Juliet Doverte, lider sa Fooda Saversmart Workers- Associated Labor Union, nipahigayon sila og strike aron pag-aghat management sa pagsibog sa ilang giduso nga closure ngadto Department of Labor and Employment (Dole).
"Di mi motuo nga nag financial losses sila. Sa panahon sa pandemic o sa dili pa pandemic, dako kaayo silag halin tungod kay ilang baligya essential," matod ni Doverte sa live interview sa Superbalita Cebu.
Si Doverte nipasangil nga ang management nagkuha og bag-ong mga kawani bisan sa pagpahibawo sa permanenteng pagpanira.
Siya niingon nga ang bag-ong gi-hire "seasonal" lang kun kon alang sa tingkusog og palit nga nga buwan sama sa Ber months dihang ang mga kustomer gipaabot nga magpanon sa supermarkets ug groceries.
"Ang mga bag-o eight hours, niya ang mga daan four hours. Asa ang hustisya ana? Ang ubang empleyado, floating, wala pa kabalik og duty," siya niingon.
Ang Fooda Savers Mart Corporation pinaagi sa Establishment Report System (ERS) sa Dole niduso sa permanenteng pagpanira niadtong Agusto 23, 2021, nga makaapekto og 243 ka mga trabahante.
Nipahibawo kini og closing sale nga matapos sa Sept. 22, 2021.
Ang Fooda dunay mga sanga sa General Maxilom Ave., barangays Guadalupe ug Kasambagan sa Cebu City, usa sa Talisay ug usa sa Consolacion.
Si Arturo Barrit, ALU executive assistant to national executive officials ug tigpamaba, niingon nga gusto sila nga ang management makigsulti kanila ug mobalik sa bargaining table aron masulbad ang yangungu sa mga trabahante.
"(This is to) start the discussion on the collective bargaining agreement that was submitted instead of them responding to it with a permanent closure," siya niingon.
Si Barrit niingon nga ang management kinahanglang magsugod sa pagpakigsabot tali sa mga trabahante pinaagi sa pagbalik sa trabaho ug mosibog sa notice of permanent closure.
Ang SunStar Cebu nikuha og pamahayag gikan sa Fooda Saversmart pinaagi sa ilang official Facebook page apan ang mga pangutana wa pa matubag ning pagsuwat.(JOB)