UYOAN nga milugos sa iyang pag-umangkon sulod sa 22 ka mga higayon dihang nagpanuigon pa kini og 8 ngadto sa 10 anyos gisikop sa kapulisan alas 2:02 sa hapon sa Huwebes, Septiyembre 16, 2021 sa Sitio Nangka, Barangay Tungasan, Isla sa Olango, Dakbayan sa Lapu-Lapu.
Si Pepe (di tinuod nga ngan), 54, usa ka scrap buyer, gisikop sa mga sakop sa Anti-Kidnapping Group-Visayas Field Unit nga gipangulohan ni Police Lt. Zosimo Ravanes ug mga sakop sa Lapu-Lapu City Police Office (LLCPO).
Si Maria (di tinuod niyang ngan), 21, dunay kapuyo, taga Dakbayan sa Sugbo, maoy nireklamo sa kapulisan niadtong Abril 1, 2021.
Si Ravanes, sa PNP-AKG VFU7 nga nahinabi sa Superbalita Cebu, nagkanayon nga si Maria nibutyag ngadto sa kapulisan nga gihimo siyang “sex slave” sa iyang uyoan sulod sa duha ka mga tuig.
Gibutyag niya nga nagpangidaron pa lang siyag 8 anyos nakuha na iyang pagkababaye sa iyang uyoan.
Nagsugod ang pagpanglugos niadtong 2008 hangtod sa 2010 kun 10 anyos na siya.
Gumikan sa iyang kahadlok kay gihudlat siya sa iyang uyoan nga patyon kon motug-an, karon lang tuiga niya gisang-at ang 22 counts sa qualified rape nga gipaburan sa korte.
Matod ni Ravanes, nga bisan kon nagpakahilom sa dugay nang panahon, gihatagag igong gibug-aton sa korte ang iyang prangka ug detalyadong pamahayag.
Si Pepe mao ang ikaupat sa mga tawo nga wanted sa Police Station 1 sa Lapu-Lapu City Police Office (LCPO).
Gibutyag ni Ravanes nga ang mga silingan ni Pepe nakahibawo na sa maong isyu, apan nagpakahilom usab sa dugay nang panahon.
“Dugay naman daw ning nahibaw-an nga gihimo ning biktima nga sex slave. Karon lang gyud siyang tuiga nakadisisyon,” dugang ni Ravanes.
Si Maria nga duna nay pamilya suportado sa iyang kapuyo sa pagpasaka og mga kaso batok kang Pepe.
Si Pepe giingong una nang mibahad nga dili siya magpadakop mga buhi.
Apan sa pag-abot sa mga sakop sa PNP-AKG VFU7 ug personnel sa LCPO, nasurpresa siya ug way nahimo, napusasan.
Wala motug-an si Pepe kon asa ang iyang armas nga gihadlokan ni Maria kay pakit-on siya niini.
Si Pepe nanghimakak sa pasangil batok kaniya.
Ang iyang alibi nga uban sa iyang mga kabanay, si Maria nagtumo-tumo og pasangil batok kaniya tungod lang sa linya sa kuryente.
Ang suspek mibutyag nga ilang giputlan sa linya sa kuryenti si Maria kay ni-tap.
Nasuko ug nagkaaway ang ilang pamilya mao nga siya gibuhat buhatan ug gipasakaag siyag kaso.
Si Judge Jose Alfonso Maliper Gomos, presiding judge sa family court, Branch 5, sa Lapu-Lapu City, maoy miisyu sa warrant of arrest nga gipitsahan og Septiyembre 15, 2021.
Wa piyansang gitugot ang korte alang sa temporaryong kagawasan ni Pepe.