KAPULISAN duna nay person of interest sa pag-ambush sa usa ka barangay kapitan sa Sitio Tapon, Brgy Tag-ube, Lungsod sa Compostela niadtong Huwebes sa hapon, Septiyembre 16, 2021.
Kini maoy gibutyag ni Police Lt. Samuel Negro, hepe sa Compostela Police Station nga nahinabi sa Superbalita Cebu, ug nga kini mitakdo sa impormasyon nga ilang nakuha ug gisubay karon.
Ang asawa mismo ni Kapitan Jionri Aligato na-estorya na usab sa imbestigador ug nihatag sab kinig ngalan.
Ang maong tawo gikatahong maoy gikabangi sa kapitan sa wa pa ang pagpang-ambush nga gikamatyan ni Jionri.
Matod ni Negros nga sa dagan sa ilang imbestigasyon, personal ang motibo sa krimen.
Matod ni Negro nga ilang gipaabot nga tugotan na sa doktor si Emedio Aligato, barangay tanod ug kauban sa kapitan atol sa ambush ug gipaubos sa operasyon human usab maangol.
Ang kapitan wa na maka-survive sa iyang mga samad, namatay siya sa Barangay Guba, Dakbayan sa Sugbo samtang gibiyahe padung sa pribadong tambalanan.
Sumala pa ni Negro nga kon makasulti na unya si Emidio, dako kini og ikatabang aron matumbok, ang mamumuno o mastermind.
Si Emedio lang maoy makasulti kon unsay iyang nakita sa dapit atol sa ambush sanglit ang mga residente layo ra igo rang nakadungog og mga buto sa pusil.
Gibutyag ni Negro nga 50 porsento na sila karon aa ilang imbestigasyon.
Nanghinaot siya nga dunay laing nakasaksi aron makatabang sa paghatag og hustisya sa kamatayon ni Jionry.
Si Jionry nga maoy kapitan sa Barangay Kaluangan, Asturias gihulagway nga anti drug crusader. Daghan na siya og naparonda nga mga plantasyon sa marijuana. (GPL)