ANG pagkapilian ug pagdumili sa mga tawo sa pagpabakuna batok sa Covid-19 maoy mga problema gihapon sa kagamhanan sa Lungsod sa Asturias, Probinsya sa Sugbo.
Matod ni Asturias Mayor Antonio Pintor nga nahinabi sa SunStar Cebu nga sukad Septiyembre 15, dunay 90 ka doses sa Sinovac ang gikabalak-ang maabtan og expiration date sanglit nangita ang kadaghanan sa iyang mga residente og Pfizer brand.
Apan si Dr. Mary Jean Loreche, spokesperson sa Visayas Vaccination Operation Center (VOCC), sa pakighinabi sa SunStar Cebu, niingon nga ang Sinovac vaccines nga gipadala sa Asturias mohupas sa tuig 2024 pa.
Ang vaccine nga mohupas karong katapusan sa Septiyembre 2021 mao ang AstraZeneca apan wa padad-i ang Asturias niini. Ang gipada sa Asturias mao ang 325 doses ug aduna pay 200 nga anaa pa sa cold chain facility sa Provincial Health Office, matod ni Loreche.
Sigon pa ni Pintor nga iyang naobserbahan kaniadtong dunay suplay sa Johnson &Johnson ug Pfizer, daghan sa iyang mga residente nagpabakuna.
Apan karon nimenos tungod kay Sinovac ang gigamit s lungsod.
“Medyo hinay gyud, mangita gyud og mga brand ang mga tawo. Niagi man gud mig Pfizer, Johnson & Johnson. Kusog kaayo sa una.
Ang Sinovac mao ray hinay. Ang mga tawo di man gusto magpa-inject. Ang Sinovac kuyawan kog ma-expire ba.Maminaw ang mga tawo og unsay ibakuna,” matod ni Pintor.
Matod ni Pintor nga dunay mga higayon nga mamukaw pa niya ang mga tawo sa iyang panimay arun magpaapil sa bakuna dihang J&J brand ang niabot sa iyang lungsod.
Dugang sa mayor nga puli-puli ang ihatag sa Department of Health (DOH) nga bakuna ngadto sa Asturias sama sa Sinovac, Astrazeneca ug uban pa.
Niadtong Septiyembre 14, dunay 10 ka mga residente ang naturukan sa bakuna samtang niadtong Septiyembre 13, dunay 30 ang nagpabakuna sa Sinovac.
Si Pintor nagkanayon nga tinguha nilang makab-ot ang 70 porsyento apan sa pagkakarun wa pa nakaabot sa 10 porsyento ang fuly vaccinated gikan sa target population ang nabakunahan sa Asturias.
Ang Asturias adunay target nga 30,000 ka taw nga kinahanglang bakunahan.
MOBILE BAKUNA
Subay niini, giplanuhan ni Pintor nga magpahigayon og mobile vaccination diin i-cluster niya ang mga barangay sa lungsod aron mahiadto ang mga eligible nga residente sa ilang tagsa-tagsa ka barangay ug hatagan usab og lima ka kilong bugas ang mga magpabakuna, sama sa gihimo sa ubang mga local government units (LGU).
Matod ni Pintor nga kasagarang reklamo sa katawhan ang ka layo sa usa ka vaccination site gikan sa ilang gipuy-an, ilabi na ang mga residente sa bukid.
Kuhaon ang pundo gikan sa Local Disaster Risk Reduction and Management Office (LDRRMO) alang sa incentivized vaccination program.
Sigon pa ni Pintor nga mangutang siya og sinakong bugas ug nakigpulong na usab siya sa Rural Health Unit (RHU) alang niini.
Nagtuo si Pintor nga mamahimong epektibo ang maong pamaagi diin sila mismo ang moduol sa mga barangay ug dunay bugas alang sa mga magpabakuna batok sa Covid-19.
Ang lima ka kilong bugas ihatag sa matag magpabakuna atol sa first dose samtang delata usab ang ihatag sa ilang pagbalik alang sa second dose aron maingganyo gyud ang mga tawo sa pagkompleto sa bakuna.
Dugang ni Pintor nga gihingusgan na nila ang pagpasabot sa katawhan nga ang bakuna ang solusyon aron di mapasa-pasa ang kagaw sa Covid-19 apan gahi gihapong kombinsihon ang mga tawo.
“Naay uban di na mamalik. Bisan sao’g pasabot, amo gyud nang giadto nga mao ra gyud ni hinungdan nga mahunong ning Covid.
Matod ni Pintor nga nakaapekto ang fake news nga nikuyanap sa social media ilabi na ang Facebook nga maoy gituohan sa publiko.
Adunay natala nga 39 aktibong kaso ang Asturias sukad Septiyembre 16, 224 ang nakarekober, 31 namatay ug nikabat sa 294 ang kinatibuk-ang kaso sa Covid-19.
HINAY GIHAPON
Samtang sa Dakbayan sa Lapu-Lapu, gibutyag ni sa deputy officer sa Lapu-Lapu Vaccination Operations Center (LVOC) James Sayson, nga nagmingaw ang ilang bag-ong giablihan nga drive thru vaccination sa Liberty Shrine sa Barangay Mactan.
Gikan sa pagbukas niini niadtong Septiyembre 13, nag-average lang ang magpabakuna pinaagi sa drive thru ug 50 ka mga sakyanan sa usa ka adlaw.
Ubos ra kaayo kini, sumala ni Sayson, sanglit sila nagtuo unta nga dumogon ang drive thru vaccination gumikan sa kasayon ug kahapsay sa proseso niini. (GCM)