SI Senator Panfilo “Ping” Lacson, usa sa mga nipadayag nga magpapili sa pagka presidente sa nasod sa nasudnong eleksiyon sa Mayo 2022, nibisita sa buhatan ni Gobernador Gwendolyn Garcia sa Kapitolyo sa Sugbo kagahapon, Septiyembre 17, 2021.
Atol sa pakighinabi sa mga tigbalita, si Garcia nagkanayon nga walay pormal nga panagsabot labot posibling pagpangayo sa senador og suporta sa kaniya ug katawhan sa probinsya sa Sugbo.
Matod ni Garcia, wala usab niprangka sa pagpangayo og suporta si Lacson.
“No, that’s not in his nature. I remember before, he also ran for president (and) my father was the governor (then), I think that was 2001, and I was the consultant for my father. He visited my Dad, but he had the decency not to ask my father (for support). I think he knew (that) my father was connected to GMA (Gloria Macapagal Arroyo) who indicated that she was going to run (for president). I told him ganina nga my father had a few words. (But) he said Lacson is a decent man,” matod ni Garcia.
Dugang ni Garcia nga sa kasamtangan, siya ug ang Once Cebu Party walay pinal nga listahan sa mga pangan nga suportahan niini sa umaabot nga piniliay.
“I think, so far, murag mao pa man nay klaro that’s why ang One Cebu has come up with a statement nga we will focus first on strengthening of One Cebu because right now the situation seems to be very fluid, so we will only decide after November 15,” matod ni Garcia.
Gawas ni Lacson, lakip sa mga unang mga politiko nga mibisita ning tuiga sa Kapitolyo mao sila si Presidential daughter Inday Sara Duterte-Carpio, Senador Risa Hontiveros ug Senador Sherwin Gatchalian.
Daghang nasudnong politiko ang mangayo og suporta sa Sugbo sa ilang kandidatura sa Sugbo human ang lalawigan maoy nag-una sa daghang botante.
Sumala pa, kon dako ang mayoriya sa boto nga makuha sa Sugbo, dako ang posibilidad nga modaug sama kang Presidente Rodrigo Duterte lakip nila ni anhing Pres. Benigno Aquino III, Pres. Gloria Macapagal Arroyo ug uban pa. (ANV)