SUPERBALITA CEBU

P2.7M nga illegal drugs nasakmit

MOBALOR og P2.7 milyunes nga illegal drugs ang nasakmit sa managlahing anti-drug operations sa kapulisan sa siyudad sa Sugbo ug sa PNP Drug Enforcement Group 7 niadtong Huwebes sa gabii, Septiyembre 16, hangtod sa Biyernes sa kaadlawon, Septiyembre 17.

Unang nadakpan ang kanhi construction worker nga taga A. Lopez, Barangay Labangon sa Siyudad sa Sugbo nga nakuhaan og binulto sa gituohang shabu.

Ang City Intelligence Unit (CIU) sa pagpangulohan ni Police Lieutenant Colonel Randy Caballes nisikop sa usa ka 25 anyos nga lalake alas 11:10 sa gabii sa Septiyembre 16, 2021.

Ang nadakpan giila nga si Anthony Ebaw Zabala, taga sitio Mahayahay 2, Barangay Calamba, Cebu City.

Nakuha gikan kaniya ang mga binulto nga putos sa gituohang shabu nga motimbang sa 220.5 ka gramos nga adunay standard value sa Dangerous Drugs Board (DDB) nga P1.2 million.

Matod ni Caballes nga migawas ang pangalan ni Zabala sa mga nanglabay nga dakop nila diin siya ang gitudlo nga tinubdan sa ilang illegal nga drugas.

Tungod niini gilusad dayon nila ang surveillance hangtod nga ilang nasuta nga tinuod ang impormasyon.

Dugang ni Caballes nga naundang sa iyang trabaho si Zabala apan ang iyang silingan nga si Josephine ang mihaylo kaniya nga mamaligya og shabu aron makasapi.

Gipailaila kini sa usa ka inmate sa Cebu City Jail nga maoy mo-facilitate sa illegal nga drugas kaniya diin matag semana hagbongan siya og 200 ngadto sa 300 gramos matag semana.

“Kini si Anthony former construction worker then naundang ni siya nya nakasilingan ni siya ni Josephine, unya gi-offeran siya para maka-income mao nang gi 200 to 300 grams per week ang ihagbong sa iyaha, naay drug personality sulod sa City Jail mao gyud to ang pinaka source and ipaagi aning Josephine,” matod ni Caballes.

Wala lang una nganli sa kapulisan kinsa ang maong binilanggo nga padayon sa iyang illegal nga negosyo nga maoy contact ni Zabala.

Pagka ala 10:5 sa kaadlawon sa Biyernes, Septiyembre 17, ang PDEG 7 uban ang Sawang Calero police station nakadakop na usab sa laing tulo ka high value individual sa Block 5, barangay Sawang Calero.

Ang mga nangadakpan mao silang Axeil James Presbitero nga maoy target sa operation, Angelo Collegado Tañag, 40, ug Joseph Tarona Sequillo, 59, pulos molupyo sa maong lugar.

Nakuha gikan kanila ang mga binulto sa gituohang shabu nga motimbag ang tanan sa kapin 200 gramos nga adunay balor nga P1.5 milyones, ug mga kagamitan sa pag-re-pack sa illegal nga drugas. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph